ہم سے کیوں الجھا کرے ہے آ سمجھ اے نا سمجھ

ہم سے کیوں الجھا کرے ہے آ سمجھ اے نا سمجھ

کج طبیعت جو مخالف ہیں انھوں سے جا سمجھ

یار کی ان بھولی باتوں پر نہ جا اے ہم نشیں

ایک فتنہ ہے وہ اس کو آہ مت لڑکا سمجھ

خوبرو عشاق سے بد پیش آتے ہی سنے

گرچہ خوش ظاہر ہیں یہ پر ان کو مت اچھا سمجھ

باغباں بے رحم گل بے دید موسم بے وفا

آشیاں اس باغ میں بلبل نے باندھا کیا سمجھ

میں جو نرمی کی تو دونا سر چڑھا وہ بد معاش

کھانے ہی کو دوڑتا ہے اب مجھے حلوہ سمجھ

دور سے دیکھی جو بدحالی وہیں سے ٹل گیا

دو قدم آگے نہ آیا مجھ کو وہ مرتا سمجھ

میرؔ کی عیاریاں معلوم لڑکوں کو نہیں

کرتے ہیں کیا کیا ادائیں اس کو سادہ سا سمجھ