humse to tumko zid si paDi hai KHwah-naKHwah rulate ho

ham se to tum ko zid sī paḌī hai ḳhvāh-naḳhvāh rulāte ho

aañkh uThā kar jab dekhe haiñ auroñ meñ hañste jaate ho

jab milne kā savāl karūñ huuñ zulf-o-ruḳh dikhlāte ho

barsoñ mujh ko yūñhī guzre sub.h-o-shām batāte ho

bikhrī rahīñ haiñ muñh par zulfeñ aañkh nahīñ khul saktī hai

kyūñke chhupe mai-ḳhvārī-e-shab jab aise raat ke maate ho

sarv tah-o-bālā hotā hai darham-barham shāḳh-e-gul

naaz se qad-kash ho ke chaman meñ ek balā tum laate ho

sub.h se yaañ phir jān-o-dil par roz qayāmat rahtī hai

raat kabhū aa rahte ho to ye din ham ko dikhlāte ho

jin ne tum ko na dekhā hove us se āñkheñ maaro tum

ek nigāh-e-muftin kar tum sau sau fitne uThāte ho

chashm to hai ik diid kī jā par kab taklīf ke laa.eq hai

dil jo hai dilchasp makāñ tum is meñ kab kab aate ho

rāhat pahuñchī Tuk tum se to ranj uThāyā barsoñ tak

sar sahlāte ho jo kabhū to bhejā bhī khā jaate ho

ho ke gadā-e-kū-e-mohabbat zor sadā ye nikālī hai

ab to 'mīr' jī rātoñ ko tum har dar par chillāte ho

hum se to tum ko zid si paDi hai KHwah-naKHwah rulate ho

aankh uTha kar jab dekhe hain auron mein hanste jate ho

jab milne ka sawal karun hun zulf-o-ruKH dikhlate ho

barson mujh ko yunhi guzre subh-o-sham batate ho

bikhri rahin hain munh par zulfen aankh nahin khul sakti hai

kyunke chhupe mai-KHwari-e-shab jab aise raat ke mate ho

sarw tah-o-baala hota hai darham-barham shaKH-e-gul

naz se qad-kash ho ke chaman mein ek bala tum late ho

subh se yan phir jaan-o-dil par roz qayamat rahti hai

raat kabhu aa rahte ho to ye din hum ko dikhlate ho

jin ne tum ko na dekha howe us se aankhen maro tum

ek nigah-e-muftin kar tum sau sau fitne uThate ho

chashm to hai ek did ki ja par kab taklif ke laeq hai

dil jo hai dilchasp makan tum is mein kab kab aate ho

rahat pahunchi Tuk tum se to ranj uThaya barson tak

sar sahlate ho jo kabhu to bheja bhi kha jate ho

ho ke gada-e-ku-e-mohabbat zor sada ye nikali hai

ab to 'mir' ji raaton ko tum har dar par chillate ho