hum to yahi kahte the hamesha dil ko kahin na lagao tum

ham to yahī kahte the hamesha dil ko kahīñ na lagāo tum

kyā kahiye na hamārī sunī ab baiThe ranj uThāo tum

jhuuT kahā kyā ham ne is meñ taur jo is se zāhir hai

haath chale to āshiq-e-zār ko ḳhāk-o-ḳhūñ meñ luTāo tum

sabr karo betāb raho ḳhāmosh phiro yā shor karo

kis ko yaañ parvā hai kisū kī Thahro aao jaao tum

naaz ġhurūr tabaḳhtur saarā phūloñ par hai chaman kā so

kyā mirzā.ī lāla-o-gul kī kuchh ḳhātir meñ na laao tum

vaa.e ki us hijrāñ-kushte ne baaġh se jaate Tuk na sunā

gul ne kahā jo ḳhūbī se apnī kuchh to hameñ farmāo tum

dast-o-pā bahutere maare sar bhī phoḌe hairat hai

kyā kariye jo be-dast-o-pā ham suuñ ke haath aao tum

ġham meñ tumhārī sūrat-e-ḳhush ke saiñkaḌoñ shakleñ go bigḌeñ

baiThe nāz-o-ġhurūr se bikhre baal apne na banāo tum

dar pe haram ke kushūd nahīñ to der meñ jā kar kāfir ho

qashqa khīñcho pothī paḌho zunnār gale se bañdhāo tum

būd-nabūd sabāt rakhe to ye bhī ik bābat hai 'mīr'

is safhe meñ harf-e-ġhalat haiñ kāshke ham ko miTāo tum

hum to yahi kahte the hamesha dil ko kahin na lagao tum

kya kahiye na hamari suni ab baiThe ranj uThao tum

jhuT kaha kya hum ne is mein taur jo is se zahir hai

hath chale to aashiq-e-zar ko KHak-o-KHun mein luTao tum

sabr karo betab raho KHamosh phiro ya shor karo

kis ko yan parwa hai kisu ki Thahro aao jao tum

naz ghurur tabaKHtur sara phulon par hai chaman ka so

kya mirzai lala-o-gul ki kuchh KHatir mein na lao tum

wae ki us hijran-kushte ne bagh se jate Tuk na suna

gul ne kaha jo KHubi se apni kuchh to hamein farmao tum

dast-o-pa bahutere mare sar bhi phoDe hairat hai

kya kariye jo be-dast-o-pa hum sun ke hath aao tum

gham mein tumhaari surat-e-KHush ke sainkaDon shaklen go bigDen

baiThe naz-o-ghurur se bikhre baal apne na banao tum

dar pe haram ke kushud nahin to der mein ja kar kafir ho

qashqa khincho pothi paDho zunnar gale se bandhao tum

bud-nabud sabaat rakhe to ye bhi ek babat hai 'mir'

is safhe mein harf-e-ghalat hain kashke hum ko miTao tum