hamari baat ko ai sham-e-bazm kariyo yaad

hamārī baat ko ai sham-e-bazm kariyo yaad

zabān-e-surḳh sar-e-sabz detī hai bar-bād

hameñ asiir to honā hai apnā achchhā yaad

kashish na daam kī dekhī na koshish-e-sayyād

na dardmandī se ye raah tum chale varna

qadam qadam pe thī yaañ jā-e-nāla-o-fariyād

hazār fāḳhta gardan meñ tauq pahne phire

use ḳhayāl nahīñ kuchh vo sarv hai āzād

jahāñ meñ itne hī āshob kyā raheñge bas

abhī paḌegā mire ḳhūn-e-be-gunah se ziyād

chaman meñ uThte haiñ sanñāhaTe se ai bulbul

jigar-ḳharāsh ye naale haiñ tere muñh se ziyād

sabāt-e-qasr-o-dar-o-bām-o-ḳhisht-o-gil kitnā

imārat-e-dil-e-darvesh kī rakho buniyād

chaman meñ yaar hameñ le ga.e the vā na hue

hamāre saath yahī ġham yahī dil-e-nāshād

hameñ to marne kā taur us ke ḳhush bahut aaya

tavāf kariye jo ho naḳhl-e-mātam-e-farhād

nazar na karnī taraf said kī dam-e-bismil

ye zulm taaza huā us kushinde se ījād

chale na teġh agar ham nigāh-e-'ijz kareñ

hamārī or na dekhe ḳhudā kare jallād

kab un ne dil meñ kar insāf ham pe lutf kiyā

vahī hai ḳhashm vahī yaañ se jā vahī bedād

tamām rījh-bachāv haiñ ab to phir pas-e-marg

kahā kinhoñ ne to kyā 'azza-ismuhū ustād

agarche ganj bhī hai par ḳharābiyāñ haiñ bahut

na phir ḳharābe meñ ai 'mīr' ḳhānamāñ-barbād

hamari baat ko ai sham-e-bazm kariyo yaad

zaban-e-surKH sar-e-sabz deti hai bar-baad

hamein asir to hona hai apna achchha yaad

kashish na dam ki dekhi na koshish-e-sayyaad

na dardmandi se ye rah tum chale warna

qadam qadam pe thi yan ja-e-nala-o-fariyaad

hazar faKHta gardan mein tauq pahne phire

use KHayal nahin kuchh wo sarw hai aazad

jahan mein itne hi aashob kya rahenge bas

abhi paDega mere KHun-e-be-gunah se ziyaad

chaman mein uThte hain sannahaTe se ai bulbul

jigar-KHarash ye nale hain tere munh se ziyaad

sabaat-e-qasr-o-dar-o-baam-o-KHisht-o-gil kitna

imarat-e-dil-e-darwesh ki rakho buniyaad

chaman mein yar hamein le gae the wa na hue

hamare sath yahi gham yahi dil-e-nashad

hamein to marne ka taur us ke KHush bahut aaya

tawaf kariye jo ho naKHl-e-matam-e-farhad

nazar na karni taraf said ki dam-e-bismil

ye zulm taza hua us kushinde se ijad

chale na tegh agar hum nigah-e-'ijz karen

hamari or na dekhe KHuda kare jallad

kab un ne dil mein kar insaf hum pe lutf kiya

wahi hai KHashm wahi yan se ja wahi bedad

tamam rijh-bachaw hain ab to phir pas-e-marg

kaha kinhon ne to kya 'azza-ismuhu ustad

agarche ganj bhi hai par KHarabiyan hain bahut

na phir KHarabe mein ai 'mir' KHanaman-barbaad