har dam wo shoKH dast-ba-shamshir kyon na ho

har dam vo shoḳh dast-ba-shamshīr kyoñ na ho

kuchh ham ne kī hai aisī hī taqsīr kyoñ na ho

ab to jigar ko ham ne balā kā hadaf kiyā

andāz us nigāh kā phir tiir kyoñ na ho

jaatā to hai kahīñ ko tū ai kārvān-e-misr

kan’āñ hī kī taraf ko ye shab-gīr kyoñ na ho

hairāñ haiñ is qadar ki agar ab ke jā.iye

phir muñh tirā na dekhiye tasvīr kyoñ na ho

tū ne to rafta rafta kiyā ham ko nang-e-ḳhalq

vahshat dilā kahāñ ta.iiñ zanjīr kyoñ na ho

juuñ gul kisū shagufta-tabī'at kā hai nishāñ

ġhuncha bhī koī ḳhātir-e-dil-gīr kyoñ na ho

hove hazār vahshat use to bhī yaar hai

aġhyār tere saath jo hoñ 'mīr' kyoñ na ho

har dam wo shoKH dast-ba-shamshir kyon na ho

kuchh hum ne ki hai aisi hi taqsir kyon na ho

ab to jigar ko hum ne bala ka hadaf kiya

andaz us nigah ka phir tir kyon na ho

jata to hai kahin ko tu ai karwan-e-misr

kan’an hi ki taraf ko ye shab-gir kyon na ho

hairan hain is qadar ki agar ab ke jaiye

phir munh tera na dekhiye taswir kyon na ho

tu ne to rafta rafta kiya hum ko nang-e-KHalq

wahshat dila kahan tain zanjir kyon na ho

jun gul kisu shagufta-tabi'at ka hai nishan

ghuncha bhi koi KHatir-e-dil-gir kyon na ho

howe hazar wahshat use to bhi yar hai

aghyar tere sath jo hon 'mir' kyon na ho