ہر دم وہ شوخ دست بہ شمشیر کیوں نہ ہو

ہر دم وہ شوخ دست بہ شمشیر کیوں نہ ہو

کچھ ہم نے کی ہے ایسی ہی تقصیر کیوں نہ ہو

اب تو جگر کو ہم نے بلا کا ہدف کیا

انداز اس نگاہ کا پھر تیر کیوں نہ ہو

جاتا تو ہے کہیں کو تو اے کاروان مصر

کنعاں ہی کی طرف کو یہ شب گیر کیوں نہ ہو

حیراں ہیں اس قدر کہ اگر اب کے جائیے

پھر منہ ترا نہ دیکھیے تصویر کیوں نہ ہو

تو نے تو رفتہ رفتہ کیا ہم کو ننگ خلق

وحشت دلا کہاں تئیں زنجیر کیوں نہ ہو

جوں گل کسو شگفتہ طبیعت کا ہے نشاں

غنچہ بھی کوئی خاطر دلگیر کیوں نہ ہو

ہووے ہزار وحشت اسے تو بھی یار ہے

اغیار تیرے ساتھ جو ہوں میرؔ کیوں نہ ہو