haram ko jaiye ya dair mein basar kariye

haram ko jā.iye yā dair meñ basar kariye

tirī talāsh meñ ik dil kidhar kidhar kariye

kaTe hai dekhiye yuuñ umr kab talak apnī

ki suniye naam tirā aur chashm-e-tar kariye

vo mast-e-nāz to machlā hai kyā jatā.iye haal

jo be-ḳhabar ho bhalā us ke tiiñ ḳhabar kariye

huā hai din to judā.ī kā sau ta.ab se shaam

shab-e-firāq kis ummīd par sahar kariye

jahāñ kā diid ba-juz mātam-e-nazāra nahīñ

ki dīdanī hī nahīñ jis pe yaañ nazar kariye

jiyoñ se jaate haiñ nā-chār aah kyā kyā log

kabhū to jānib-e-ushshāq bhī guzar kariye

sitam uThāne kī tāqat nahīñ hai ab is ko

jo dil meñ aave to Tuk rahm 'mīr' par kariye

haram ko jaiye ya dair mein basar kariye

teri talash mein ek dil kidhar kidhar kariye

kaTe hai dekhiye yun umr kab talak apni

ki suniye nam tera aur chashm-e-tar kariye

wo mast-e-naz to machla hai kya jataiye haal

jo be-KHabar ho bhala us ke tin KHabar kariye

hua hai din to judai ka sau tab se sham

shab-e-firaq kis ummid par sahar kariye

jahan ka did ba-juz matam-e-nazara nahin

ki didani hi nahin jis pe yan nazar kariye

jiyon se jate hain na-chaar aah kya kya log

kabhu to jaanib-e-ushshaq bhi guzar kariye

sitam uThane ki taqat nahin hai ab is ko

jo dil mein aawe to Tuk rahm 'mir' par kariye