ادھر مت کر نگاہ تیز جا بیٹھ

ادھر مت کر نگاہ تیز جا بیٹھ

نہ تیر روئے ترکش یوں چلا بیٹھ

اثر ہوتا تو کب کا ہو بھی چکتا

دعائے صبح سے اب ہاتھ اٹھا بیٹھ

پھرے گا ہم سے کب تک دور ظالم

کبھو تو گھر سے اٹھ کر پاس آ بیٹھ

نہ کر دیوار کا مجلس میں تکیہ

ہمارے مونڈھے سے مونڈھا لگا بیٹھ

بہت پھرتے ہیں ٹیڑھے ٹیڑھے دشمن

انہیں دو سیدھیاں تو بھی سنا بیٹھ

تلاش اپنی نہ کم تھی جو وہ ملتا

بہت میں دیکھ کر آخر رہا بیٹھ

مخالف سے نہ مل بیٹھا کر اتنا

کہیں لے میرؔ صاحب کو جدا بیٹھ