is rang se jo zard zubun zar hain hum log

is rang se jo zard zubūñ zaar haiñ ham log

dil ke maraz-e-‘ishq se bīmār haiñ ham log

kyā apne ta.iiñ pastī bulandī se jahāñ kī

ab ḳhaak barābar hue hamvār haiñ ham log

maqsūd to hāsil hai talab shart paḌī hai

vo matlab-e-‘umda hai talabgār haiñ ham log

ḳhūñ-rez hī laḌkoñ se laḌā rahte haiñ āñkheñ

gar qatl kareñ ham ko sazā-vār haiñ ham log

dil phañs rahe haiñ daam meñ zulfoñ ke kisū kī

tang apne jiyoñ se haiñ giraftār haiñ ham log

bāzār kī bhī jins pe jī dete haiñ 'āshiq

sar bechte phirte haiñ ḳharīdār haiñ ham log

in pariyoñ se laḌkoñ hī ke jhapTe meñ dil aa.e

be-hosh-o-ḳhirad jaise parī-dār haiñ ham log

dar par kisū ke jā ke khaḌe hoñ to khaḌe haiñ

hairat-zada-e-‘ishq haiñ dīvār haiñ ham log

jaate haiñ chale qāfla-dar-qāfla us raah

chalne meñ taraddud nahīñ tayyār haiñ ham log

maare hī paḌeñ kuchh kaheñ 'ushshāq to shāyad

hairat se haiñ chup tis pe gunahgār haiñ ham log

go nīchī nazar 'mīr' kī ho āñkheñ to Tuk dekh

kyā dil-zadagāñ saada meñ purkār haiñ ham log

is rang se jo zard zubun zar hain hum log

dil ke maraz-e-‘ishq se bimar hain hum log

kya apne tain pasti bulandi se jahan ki

ab KHak barabar hue hamwar hain hum log

maqsud to hasil hai talab shart paDi hai

wo matlab-e-‘umda hai talabgar hain hum log

KHun-rez hi laDkon se laDa rahte hain aankhen

gar qatl karen hum ko saza-war hain hum log

dil phans rahe hain dam mein zulfon ke kisu ki

tang apne jiyon se hain giraftar hain hum log

bazar ki bhi jins pe ji dete hain 'ashiq

sar bechte phirte hain KHaridar hain hum log

in pariyon se laDkon hi ke jhapTe mein dil aae

be-hosh-o-KHirad jaise pari-dar hain hum log

dar par kisu ke ja ke khaDe hon to khaDe hain

hairat-zada-e-‘ishq hain diwar hain hum log

jate hain chale qafla-dar-qafla us rah

chalne mein taraddud nahin tayyar hain hum log

mare hi paDen kuchh kahen 'ushshaq to shayad

hairat se hain chup tis pe gunahgar hain hum log

go nichi nazar 'mir' ki ho aankhen to Tuk dekh

kya dil-zadagan sada mein purkar hain hum log