ishq agar hai mard-e-maidan mard koi arse mein lae

'ishq agar hai mard-e-maidāñ mard koī 'arse meñ laa.e

yaksar in nāmardoñ ko jo ek hī tak-tak-e-pā meñ uThā.e

kār-e-‘adālat shahr kā ham ko ik din do din hove to phir

chāroñ or munādī kariye koī kisī se dil na lagā.e

par ke asīr-e-dām hue the nikle TuuTī shikan kī raah

ab ke dekheñ mausam gul kā kaise kaise shagūfe laa.e

bhūke marte marte muñh meñ talḳhī-e-safrā phail ga.ī

be-zauqī meñ zauq kahāñ jo khānā piinā mujh ko bhaa.e

ghar se nikal kar khaḌe khaḌe phir jaatā huuñ maiñ yā'nī 'mīr'

'ishq-o-junūñ kā āvāra hairān pareshāñ kīdhar jaa.e

'ishq agar hai mard-e-maidan mard koi 'arse mein lae

yaksar in namardon ko jo ek hi tak-tak-e-pa mein uThae

kar-e-‘adalat shahr ka hum ko ek din do din howe to phir

chaaron or munadi kariye koi kisi se dil na lagae

par ke asir-e-dam hue the nikle TuTi shikan ki rah

ab ke dekhen mausam gul ka kaise kaise shagufe lae

bhuke marte marte munh mein talKHi-e-safra phail gai

be-zauqi mein zauq kahan jo khana pina mujh ko bhae

ghar se nikal kar khaDe khaDe phir jata hun main ya'ni 'mir'

'ishq-o-junun ka aawara hairan pareshan kidhar jae