ishq ne hum ko mar rakha hai ji mein apne tab nahin

'ishq ne ham ko maar rakhā hai jī meñ apne taab nahīñ

dil ko ḳhayāl-e-sabr nahīñ āñkhoñ ko mail-e-ḳhvāb nahīñ

koī sabab aisā ho yārab jis se 'izzat rah jaave

'ālam meñ asbāb ke haiñ par paas apne asbāb nahīñ

qaht nahīñ hai dil kā ab man maare tum kyoñ phirte ho

lene vaalā chāhiye is kā aisā to kamyāb nahīñ

ḳhat kā javāb na likhne kī kuchh vaj.h na zāhir ham pe huī

der talak qāsid se pūchhā muñh meñ us ke javāb nahīñ

ronā roz-e-shumār kā mujh ko aaTh pahar ab rahtā hai

yā'nī mere gunāhoñ ko kuchh hasr-o-hadd-o-hisāb nahīñ

rang shikasta dil hai shikasta sar hai shikasta mastī meñ

haal kisū kā apnā sā is maiḳhāne meñ ḳharāb nahīñ

Thahreñ 'mīr' kisū jāgah ham dil ko qarār jo Tuk aave

ho ke faqīr us dar par baiTheñ is ke bhī ham baab nahīñ

'ishq ne hum ko mar rakha hai ji mein apne tab nahin

dil ko KHayal-e-sabr nahin aankhon ko mail-e-KHwab nahin

koi sabab aisa ho yarab jis se 'izzat rah jawe

'alam mein asbab ke hain par pas apne asbab nahin

qaht nahin hai dil ka ab man mare tum kyon phirte ho

lene wala chahiye is ka aisa to kamyab nahin

KHat ka jawab na likhne ki kuchh wajh na zahir hum pe hui

der talak qasid se puchha munh mein us ke jawab nahin

rona roz-e-shumar ka mujh ko aaTh pahar ab rahta hai

ya'ni mere gunahon ko kuchh hasr-o-hadd-o-hisab nahin

rang shikasta dil hai shikasta sar hai shikasta masti mein

haal kisu ka apna sa is maiKHane mein KHarab nahin

Thahren 'mir' kisu jagah hum dil ko qarar jo Tuk aawe

ho ke faqir us dar par baiThen is ke bhi hum bab nahin