ittifaq aisa hai kuDhte hi sada rahte hain

ittifāq aisā hai kuḌhte hī sadā rahte haiñ

ek aalam meñ haiñ ham ve pe judā rahte haiñ

barse talvār ki haa.il ho koī sail-e-balā

pesh kuchh aao ham us kūche meñ jā rahte haiñ

kaam aatā hai mayassar kise un hoñToñ se

bābat-e-bosa haiñ par sab ko chumā rahte haiñ

dasht meñ gard-e-rah us kī uThe hai jīdhar se

vahsh-o-tair āñkheñ udhar hī ko lagā rahte haiñ

kyā tirī garmī-e-bāzār kaheñ ḳhūbī kī

saiñkaḌoñ aan ke yūsuf se bikā rahte haiñ

bistara ḳhāk-e-rah us kī to hai apnā lekin

girya-e-ḳhūnīñ se lohū meñ nahā rahte haiñ

kyoñ uḌāte ho bulāyā hameñ kab kab ham aap

jaise gardān-kabūtar yahīñ aa rahte haiñ

haq-talaf-kun haiñ butāñ yaad dilā.ūñ kab tak

har sahar sohbat-e-doshīñ ko bhulā rahte haiñ

yaad meñ us ke qad-o-qāmat-e-dilkash kī 'mīr'

apne sar ek qayāmat na.ī lā rahte haiñ

ittifaq aisa hai kuDhte hi sada rahte hain

ek aalam mein hain hum we pe juda rahte hain

barse talwar ki hail ho koi sail-e-bala

pesh kuchh aao hum us kuche mein ja rahte hain

kaam aata hai mayassar kise un honTon se

babat-e-bosa hain par sab ko chuma rahte hain

dasht mein gard-e-rah us ki uThe hai jidhar se

wahsh-o-tair aankhen udhar hi ko laga rahte hain

kya teri garmi-e-bazar kahen KHubi ki

sainkaDon aan ke yusuf se bika rahte hain

bistara KHak-e-rah us ki to hai apna lekin

girya-e-KHunin se lohu mein naha rahte hain

kyon uDate ho bulaya hamein kab kab hum aap

jaise gardan-kabutar yahin aa rahte hain

haq-talaf-kun hain butan yaad dilaun kab tak

har sahar sohbat-e-doshin ko bhula rahte hain

yaad mein us ke qad-o-qamat-e-dilkash ki 'mir'

apne sar ek qayamat nai la rahte hain