izzat apni ab nahin hai yar ko manzur Tuk

izzat apnī ab nahīñ hai yaar ko manzūr Tuk

paas jaatā huuñ to kahtā hai ki baiTho duur Tuk

haal merā shahr meñ kahte raheñge log der

is fasāne ke ta.iiñ hone to do mash.hūr Tuk

pusht-e-pā maare haiñ shāhī par gadā-e-kū-e-ishq

dekho tum yaañ kā ḳhudā ke vāste dastūr Tuk

chāhne kā mujh se be-qudrat kā kyā hai e.atibār

ishq karne ko kisū ke chāhiye maqdūr Tuk

haq to sab kuchh thā hī nāhaq jaan dī kis vāste

hausle se baat kartā kāshke mansūr Tuk

munkir-e-husn-e-butāñ kyūñkar na hove shaiḳh-e-shahr

haq hai us kī or vo āñkhoñ se hai ma.azūr Tuk

phir kahīñ kyā dil lagāyā 'mīr' jo hai zard-rū

muñh par aaya thā tire do chaar din se nuur Tuk

izzat apni ab nahin hai yar ko manzur Tuk

pas jata hun to kahta hai ki baiTho dur Tuk

haal mera shahr mein kahte rahenge log der

is fasane ke tain hone to do mashhur Tuk

pusht-e-pa mare hain shahi par gada-e-ku-e-ishq

dekho tum yan ka KHuda ke waste dastur Tuk

chahne ka mujh se be-qudrat ka kya hai eatibar

ishq karne ko kisu ke chahiye maqdur Tuk

haq to sab kuchh tha hi nahaq jaan di kis waste

hausle se baat karta kashke mansur Tuk

munkir-e-husn-e-butan kyunkar na howe shaiKH-e-shahr

haq hai us ki or wo aankhon se hai mazur Tuk

phir kahin kya dil lagaya 'mir' jo hai zard-ru

munh par aaya tha tere do chaar din se nur Tuk