jawe judai ka ye aazar gah-bashad

jaave judā.ī kā ye āzār gāh-bāshad

achchhā bhī hove dil kā bīmār gāh-bāshad

ummīd-vār us ke milne ke jaise haiñ ham

aa nikle naaz kartā yaañ yaar gāh-bāshad

go qadr dil kī kam hai par chiiz kaam kī hai

le to rakheñ tumheñ ho darkār gāh-bāshad

kahtā huuñ so kare hai lekin rahūñ huuñ Dartā

aave kisū suḳhan par takrār gāh-bāshad

kahte to haiñ ga.e so kab aa.e kyā kareñ tab

jo ḳhvāb-e-marg se hoñ bedār gāh-bāshad

ġhusse se apne abrū jo ḳham kare hai har-dam

vo ik lagā bhī baiThe talvār gāh-bāshad

ġhairat se 'ishq kī Dar kyā shaiḳh kibr-e-dīnī

tasbīh kā ho rishta zunnār gāh-bāshad

vahshat pe merī mat jā ġhairat bahut hai mujh ko

ho baiThūñ marne ko bhī tayyār gāh-bāshad

hai zabt-e-'ishq mushkil hotā nahīñ kisū se

Dar 'mīr' bhī ho is kā iz.hār gāh-bāshad

jawe judai ka ye aazar gah-bashad

achchha bhi howe dil ka bimar gah-bashad

ummid-war us ke milne ke jaise hain hum

aa nikle naz karta yan yar gah-bashad

go qadr dil ki kam hai par chiz kaam ki hai

le to rakhen tumhein ho darkar gah-bashad

kahta hun so kare hai lekin rahun hun Darta

aawe kisu suKHan par takrar gah-bashad

kahte to hain gae so kab aae kya karen tab

jo KHwab-e-marg se hon bedar gah-bashad

ghusse se apne abru jo KHam kare hai har-dam

wo ek laga bhi baiThe talwar gah-bashad

ghairat se 'ishq ki Dar kya shaiKH kibr-e-dini

tasbih ka ho rishta zunnar gah-bashad

wahshat pe meri mat ja ghairat bahut hai mujh ko

ho baiThun marne ko bhi tayyar gah-bashad

hai zabt-e-'ishq mushkil hota nahin kisu se

Dar 'mir' bhi ho is ka izhaar gah-bashad