جاوے جدائی کا یہ آزار گاہ باشد

جاوے جدائی کا یہ آزار گاہ باشد

اچھا بھی ہووے دل کا بیمار گاہ باشد

امیدوار اس کے ملنے کے جیسے ہیں ہم

آ نکلے ناز کرتا یاں یار گاہ باشد

گو قدر دل کی کم ہے پر چیز کام کی ہے

لے تو رکھیں تمہیں ہو درکار گاہ باشد

کہتا ہوں سو کرے ہے لیکن رہوں ہوں ڈرتا

آوے کسو سخن پر تکرار گاہ باشد

کہتے تو ہیں گئے سو کب آئے کیا کریں تب

جو خواب مرگ سے ہوں بیدار گاہ باشد

غصے سے اپنے ابرو جو خم کرے ہے ہر دم

وہ اک لگا بھی بیٹھے تلوار گاہ باشد

غیرت سے عشق کی ڈر کیا شیخ کبر دینی

تسبیح کا ہو رشتہ زنار گاہ باشد

وحشت پہ میری مت جا غیرت بہت ہے مجھ کو

ہو بیٹھوں مرنے کو بھی تیار گاہ باشد

ہے ضبط عشق مشکل ہوتا نہیں کسو سے

ڈر میرؔ بھی ہو اس کا اظہار گاہ باشد