jaziba mera tha kaamil so bande ke wo ghar aaya

jāziba merā thā kāmil so bande ke vo ghar aaya

shukr ḳhudā kā kariye kahāñ tak ahd-e-firāq basar aaya

bijlī sā vo chamak gayā āñkhoñ se phuiyeñ paḌne lagīñ

abr-namat ḳhafagī se us bin jī bhī ruñDhā dil bhar aaya

gul the sau sau rang par aisā shor-e-tuyūr buland na thā

us ke rang chaman meñ koī shāyad phuul nazar aaya

sail-e-balā joshāñ thā lekin paanī paanī sharm se thā

sāhil-e-dariyā ḳhushk-labī dekhe se merī tar aaya

kyā hī ḳhush-purkār hai dilbar naucha-e-kushtī-gīr apnā

koī zabardast us se laḌ kar ohde se kab bar aaya

san.at-gariyāñ bahuterī kiiñ lek dareġh hazār dareġh

jis se yaar bhī miltā ham se aisā vo na hunar aaya

'mīr' pareshāñ-ḳhātir aa kar raat rahā but-ḳhāne meñ

raah rahī ka.abe kī ūdhar ye saudā.ī kidhar aaya

jaziba mera tha kaamil so bande ke wo ghar aaya

shukr KHuda ka kariye kahan tak ahd-e-firaq basar aaya

bijli sa wo chamak gaya aankhon se phuiyen paDne lagin

abr-namat KHafagi se us bin ji bhi runDha dil bhar aaya

gul the sau sau rang par aisa shor-e-tuyur buland na tha

us ke rang chaman mein koi shayad phul nazar aaya

sail-e-bala joshan tha lekin pani pani sharm se tha

sahil-e-dariya KHushk-labi dekhe se meri tar aaya

kya hi KHush-purkar hai dilbar naucha-e-kushti-gir apna

koi zabardast us se laD kar ohde se kab bar aaya

sanat-gariyan bahuteri kin lek daregh hazar daregh

jis se yar bhi milta hum se aisa wo na hunar aaya

'mir' pareshan-KHatir aa kar raat raha but-KHane mein

rah rahi kabe ki udhar ye saudai kidhar aaya