jahan mein roz hai aashob uski qamat se

jahāñ meñ roz hai āshob us kī qāmat se

uThe hai fitna har ik shoḳh-tar qayāmat se

muā huuñ ho ke dil-afsurda ranj-e-kulfat se

uge hai sabza-e-pazhmurda merī turbat se

jahāñ mile tahāñ kāfir hī honā paḌtā hai

ḳhudā panāh meñ rakkhe butoñ kī sohbat se

tasallī un ne na kī ek do suḳhan se kabhū

jo koī baat kahī bhī to aadhī luknat se

palak ke mārte ham to nazar nahīñ aate

suḳhan karo ho abas tum hamārī fursat se

amīr-zādoñ se dillī ke mil na tā-maqdūr

ki ham faqīr hue haiñ unhīñ kī daulat se

ye jahl dekh ki an-samjhe maiñ uThā laayā

girāñ vo baar jo thā besh apnī tāqat se

rahā na hogā ba-ḳhud sāne’-e-azal bhī tab

banāyā hogā jab us muñh ko dast-e-qudrat se

vo āñkheñ phere hī letā hai dekhte kyā ho

muāmlat hai hameñ dil kī be-muravvat se

jo soche Tuk to vo matlūb ham hī nikle 'mīr'

ḳharāb phirte the jis kī talab meñ muddat se

jahan mein roz hai aashob us ki qamat se

uThe hai fitna har ek shoKH-tar qayamat se

mua hun ho ke dil-afsurda ranj-e-kulfat se

uge hai sabza-e-pazhmurda meri turbat se

jahan mile tahan kafir hi hona paDta hai

KHuda panah mein rakkhe buton ki sohbat se

tasalli un ne na ki ek do suKHan se kabhu

jo koi baat kahi bhi to aadhi luknat se

palak ke marte hum to nazar nahin aate

suKHan karo ho abas tum hamari fursat se

amir-zadon se dilli ke mil na ta-maqdur

ki hum faqir hue hain unhin ki daulat se

ye jahl dekh ki an-samjhe main uTha laya

giran wo bar jo tha besh apni taqat se

raha na hoga ba-KHud sane’-e-azal bhi tab

banaya hoga jab us munh ko dast-e-qudrat se

wo aankhen phere hi leta hai dekhte kya ho

muamlat hai hamein dil ki be-murawwat se

jo soche Tuk to wo matlub hum hi nikle 'mir'

KHarab phirte the jis ki talab mein muddat se