جیسا مزاج آگے تھا میرا سو کب ہے اب

جیسا مزاج آگے تھا میرا سو کب ہے اب

ہر روز دل کو سوز ہے ہر شب تعب ہے اب

سدھ کچھ سنبھالتے ہی وہ مغرور ہو گیا

ہر آن بے دماغی و ہر دم غضب ہے اب

دوری سے اس کی آہ عجب حال میں ہیں لوگ

کچھ بھی جو پاس وہ نہ کرے تو عجب ہے اب

طاقت کہ جس سے تاب جفا تھی سو ہو چکی

تھوڑی سی کوفت میں بھی بہت سا تعب ہے اب

دریا چلا ہے آج تو بوس و کنار کا

گر جی چلاوے کوئی دوانہ تو ڈھب ہے اب

جاں بخشیاں جو پیشتر از خط کیا کیے

ان ہی لبوں سے خلق خدا جاں بہ لب ہے اب

رنجش کی وجہ آگے تو ہوتی بھی تھی کوئی

روپوش ہم سے یار جو ہے بے سبب ہے اب

نے چاہ وہ اسے ہے نہ مجھ کو ہے وہ دماغ

جانا مرا ادھر کو بہ شرط طلب ہے اب

جاتا ہوں دن کو ملنے تو کہتا ہے دن ہے میرؔ

جو شب کو جائیے تو کہے ہے کہ شب ہے اب