jama hote nahin hawas kahin

jam.a hote nahīñ havās kahīñ

jaa.eñ yaañ se jo ham udaas kahīñ

dil kī do ashk se na niklī bhaḌās

osoñ bujhtī nahīñ hai pyaas kahīñ

baav ḳhushbū hai aa.ī hai vaañ se

koī chhuptī hai gul kī baas kahīñ

is junūñ meñ kahīñ hai sar par ḳhaak

TukḌe ho kar girā libās kahīñ

gird-e-sar yaar ke phireñ pahroñ

ham jo hoñ us ke ās-pās kahīñ

sab jagah log haqq-o-nāhaq par

na milā haif haq-shanās kahīñ

har taraf haiñ umīd-vār-e-yār

us se koī nahīñ nirās kahīñ

'ishq kā mahv dast-e-shīrīñ huuñ

jaan kā bhī nahīñ hirās kahīñ

'arsh tak to ḳhayāl pahuñche 'mīr'

vahm phir hai kahīñ qayās kahīñ

jama hote nahin hawas kahin

jaen yan se jo hum udas kahin

dil ki do ashk se na nikli bhaDas

oson bujhti nahin hai pyas kahin

baw KHushbu hai aai hai wan se

koi chhupti hai gul ki bas kahin

is junun mein kahin hai sar par KHak

TukDe ho kar gira libas kahin

gird-e-sar yar ke phiren pahron

hum jo hon us ke aas-pas kahin

sab jagah log haqq-o-nahaq par

na mila haif haq-shanas kahin

har taraf hain umid-war-e-yar

us se koi nahin niras kahin

'ishq ka mahw dast-e-shirin hun

jaan ka bhi nahin hiras kahin

'arsh tak to KHayal pahunche 'mir'

wahm phir hai kahin qayas kahin