jhuTe bhi puchhte nahin Tuk haal aan kar

jhūTe bhī pūchhte nahīñ Tuk haal aan kar

anjān itne kyoñ hue jaate ho jaan kar

ve log tum ne ek hī shoḳhī meñ kho diye

paidā kiye the charḳh ne jo ḳhaak chhān kar

jhamke dikhā ke bā’is-e-hangāma hī rahe

par ghar se dar pe aa.e na tum baat maan kar

kahte na the ki jaan se jaate raheñge ham

achchhā nahīñ hai aa na hameñ imtihān kar

kam-go jo ham hue to sitam kuchh na ho gayā

achchhī nahīñ ye baat mat itnī zabān kar

ham ve haiñ jin ke ḳhuuñ se tirī raah sab hai gul

mat kar ḳharāb ham ko tū auroñ meñ saan kar

tā kushta-e-vafā mujhe jaane tamām ḳhalq

turbat pe merī ḳhuun se mere nishān kar

nāz-o-‘itāb-o-ḳhashm kahāñ tak uThā.iye

yā-rab kabhū to ham pe use mehrbān kar

afsāne mā-o-man ke suneñ 'mīr' kab talak

chal ab ki soveñ muñh pe dupaTTe ko taan kar

jhuTe bhi puchhte nahin Tuk haal aan kar

anjaan itne kyon hue jate ho jaan kar

we log tum ne ek hi shoKHi mein kho diye

paida kiye the charKH ne jo KHak chhan kar

jhamke dikha ke ba’is-e-hangama hi rahe

par ghar se dar pe aae na tum baat man kar

kahte na the ki jaan se jate rahenge hum

achchha nahin hai aa na hamein imtihan kar

kam-go jo hum hue to sitam kuchh na ho gaya

achchhi nahin ye baat mat itni zaban kar

hum we hain jin ke KHun se teri rah sab hai gul

mat kar KHarab hum ko tu auron mein san kar

ta kushta-e-wafa mujhe jaane tamam KHalq

turbat pe meri KHun se mere nishan kar

naz-o-‘itab-o-KHashm kahan tak uThaiye

ya-rab kabhu to hum pe use mehrban kar

afsane ma-o-man ke sunen 'mir' kab talak

chal ab ki sowen munh pe dupaTTe ko tan kar