ji chahe mil kisu se ya sab se tu juda rah

jī chāhe mil kisū se yā sab se tū judā rah

par ho sake to pyāre Tuk dil kā āshnā rah

kal be-takallufī meñ lutf us badan kā dekhā

niklā na kar qabā se ai gul bas ab Dhapā rah

'āshiq-ġhayūr jī de aur is taraf na dekhe

vo aañkh jo chhupāve to tū bhī Tuk khiñchā rah

pahuñcheñge aage dekheñ kis darja ko abhī to

is māh-e-chārdah kā sin das hai yā ki bārah

khīñchā kare hai har dam kyā teġh bul-havas par

us nā-sazā-e-ḳhūñ ke itnā na sar chaḌhā rah

mustaz.har-e-mohabbat thā kohkan vagarna

ye bojh kis se uThtā ek aur ek gyārah

har musht-e-ḳhāk yaañ kī chāhe hai ik ta.ammul

bin soche raah mat chal har gaam par khaḌā rah

shāyad ki sar-bulandī hove nasīb tere

juuñ gard-e-rāh sab ke paañv se tū lagā rah

us ḳhatt-e-sabz ne kuchh rūyat na rakkhī terī

kyā aisī zindagānī jā ḳhizr zahr khā rah

had se ziyāda vā'iz ye kūdnā uchhalnā

kaahe ko jaate haiñ ham ai ḳhirs ab bañdhā rah

maiñ tū haiñ vahm donoñ kyā hai ḳhayāl tujh ko

jhaaḌ āstīn mujh se haath aap se uThā rah

jaise ḳhayāl-e-muflis jaatā hai sau jagah tū

mujh be-navā ke bhī ghar ek-ādh raat aa rah

dauḌe bahut valekin matlab ko kaun pahuñchā

ā.inda tū bhī ham sā ho kar shikasta-pā rah

jab hosh meñ tū aayā ūdhar hī jaate paayā

is se to 'mīr' chande us kūche hī meñ jā rah

ji chahe mil kisu se ya sab se tu juda rah

par ho sake to pyare Tuk dil ka aashna rah

kal be-takallufi mein lutf us badan ka dekha

nikla na kar qaba se ai gul bas ab Dhapa rah

'ashiq-ghayur ji de aur is taraf na dekhe

wo aankh jo chhupawe to tu bhi Tuk khincha rah

pahunchenge aage dekhen kis darja ko abhi to

is mah-e-chaardah ka sin das hai ya ki barah

khincha kare hai har dam kya tegh bul-hawas par

us na-saza-e-KHun ke itna na sar chaDha rah

mustazhar-e-mohabbat tha kohkan wagarna

ye bojh kis se uThta ek aur ek gyarah

har musht-e-KHak yan ki chahe hai ek tammul

bin soche rah mat chal har gam par khaDa rah

shayad ki sar-bulandi howe nasib tere

jun gard-e-rah sab ke panw se tu laga rah

us KHatt-e-sabz ne kuchh ruyat na rakkhi teri

kya aisi zindagani ja KHizr zahr kha rah

had se ziyaada wa'iz ye kudna uchhalna

kahe ko jate hain hum ai KHirs ab bandha rah

main tu hain wahm donon kya hai KHayal tujh ko

jhaD aastin mujh se hath aap se uTha rah

jaise KHayal-e-muflis jata hai sau jagah tu

mujh be-nawa ke bhi ghar ek-adh raat aa rah

dauDe bahut walekin matlab ko kaun pahuncha

aainda tu bhi hum sa ho kar shikasta-pa rah

jab hosh mein tu aaya udhar hi jate paya

is se to 'mir' chande us kuche hi mein ja rah