ji ruk gae ai hamdam dil KHun ho bhar aaya

jī ruk ga.e ai hamdam dil ḳhuun ho bhar aayā

ab zabt kareñ kab tak muñh tak to jigar aayā

thī chashm dam-e-āḳhir vo dekhne āvegā

so āñkhoñ meñ jī aayā par vo na nazar aayā

be-sudh paḌe haiñ saare sajjādoñ pe islāmī

daarū piye vo kāfir kaahe ko idhar aayā

har ḳhasta tirā ḳhvāhāñ yak zaḳhm-e-digar kā thā

kī mashq-e-sitam tū ne par ḳhuun na kar aayā

gul-barg hī kuchh tanhā paanī nahīñ ḳhajlat se

jumbish se tire lab kī yāqūt bhī tar aayā

bil-fe.al to hai qāsid mahv us ḳhat-o-gesū kā

Tuk chete to ham pūchheñ kyā le ke ḳhabar aayā

tābūt pe bhī mere patthar paḌe le jaate

is naḳhl meñ mātam ke kyā ḳhuub samar aayā

hai haq-ba-taraf us ke yuuñ jis ke gayā ho tū

saj aisī tirī dekhī ham ko bhī ḳhatar aayā

kyā kahiye ki patthar se sar mārte ham guzre

yuuñ apnā zamāna to bin yaar basar aayā

san.at-gariyāñ ham ne kiiñ saiñkaḌoñ yaañ lekin

jis se kabhū vo miltā aisā na hunar aayā

dar hī ke ta.iiñ takte pathrā ga.iiñ āñkheñ to

vo zālim-e-sangīñ-dil kab 'mīr' ke ghar aayā

ji ruk gae ai hamdam dil KHun ho bhar aaya

ab zabt karen kab tak munh tak to jigar aaya

thi chashm dam-e-aKHir wo dekhne aawega

so aankhon mein ji aaya par wo na nazar aaya

be-sudh paDe hain sare sajjadon pe islami

daru piye wo kafir kahe ko idhar aaya

har KHasta tera KHwahan yak zaKHm-e-digar ka tha

ki mashq-e-sitam tu ne par KHun na kar aaya

gul-barg hi kuchh tanha pani nahin KHajlat se

jumbish se tere lab ki yaqut bhi tar aaya

bil-feal to hai qasid mahw us KHat-o-gesu ka

Tuk chete to hum puchhen kya le ke KHabar aaya

tabut pe bhi mere patthar paDe le jate

is naKHl mein matam ke kya KHub samar aaya

hai haq-ba-taraf us ke yun jis ke gaya ho tu

saj aisi teri dekhi hum ko bhi KHatar aaya

kya kahiye ki patthar se sar marte hum guzre

yun apna zamana to bin yar basar aaya

sanat-gariyan hum ne kin sainkaDon yan lekin

jis se kabhu wo milta aisa na hunar aaya

dar hi ke tain takte pathra gain aankhen to

wo zalim-e-sangin-dil kab 'mir' ke ghar aaya