jis raftani ko ishq ka aazar ho gaya

jis raftanī ko ishq kā āzār ho gayā

do-chār din meñ barsoñ kā bīmār ho gayā

nisbat bahut gunāhoñ kī merī taraf huī

nā-karda-jurm maiñ to gunahgār ho gayā

hairat-zada maiñ ishq ke kāmoñ kā yaar ke

darvāze par khaḌe khaḌe dīvār ho gayā

phaile shigāf siine ke atrāf dard se

kūcha har ek zaḳhm kā bāzār ho gayā

bāzār meñ jahān ke hai husn kyā matā.a

sau jī se jis ne dekhā ḳharīdār ho gayā

dil le ke merī jaan kā dushman huā nidān

jis bevafā se apne ta.iiñ pyaar ho gayā

āshiq ko us kī teġh se hai laag khiñchte hī

ye kushtanī bhī marne ko tayyār ho gayā

marte muā rihā na huā tang hī rahā

phande meñ ishq ke jo giraftār ho gayā

kyā jurm thā kisū pe na mā'lūm kuchh huā

jo 'mīr' kusht-o-ḳhūñ kā sazā-vār ho gayā

jis raftani ko ishq ka aazar ho gaya

do-chaar din mein barson ka bimar ho gaya

nisbat bahut gunahon ki meri taraf hui

na-karda-jurm main to gunahgar ho gaya

hairat-zada main ishq ke kaamon ka yar ke

darwaze par khaDe khaDe diwar ho gaya

phaile shigaf sine ke atraf dard se

kucha har ek zaKHm ka bazar ho gaya

bazar mein jahan ke hai husn kya mataa

sau ji se jis ne dekha KHaridar ho gaya

dil le ke meri jaan ka dushman hua nidan

jis bewafa se apne tain pyar ho gaya

aashiq ko us ki tegh se hai lag khinchte hi

ye kushtani bhi marne ko tayyar ho gaya

marte mua riha na hua tang hi raha

phande mein ishq ke jo giraftar ho gaya

kya jurm tha kisu pe na ma'lum kuchh hua

jo 'mir' kusht-o-KHun ka saza-war ho gaya