jo junun-o-ishq ki tadbir hai

jo junūn-o-ishq kī tadbīr hai

so na yaañ shamshīr nai zanjīr hai

vasf us kā baaġh meñ karnā na thā

gul hamārā ab garebāñ-gīr hai

dekh rahtā hai jo dekhe hai use

dilrubā ā.īna-rū tasvīr hai

pā.e-gīr us ke na hoñ kyoñ dard-mand

halqa halqa zulf vo zanjīr hai

said ke tan par haiñ sab gulhā-e-zaḳhm

kis qadar ḳhush-kār us kā tiir hai

muddat-e-hijrāñ ne kī nai kuchh kamī

mere tūl-e-umr kī taqsīr hai

ḳhat na likhte the so tāb-e-dil ga.ī

daftaroñ kī aksar ab tahrīr hai

rakh nazar meñ bhī ḳharāb ābādiyāñ

ai ki tujh ko kuchh ġham-e-ta.amīr hai

saḳht kāfir haiñ barahman-zād-gāñ

muslimoñ kī un ke haañ takfīr hai

guftugū meñ rahte the aage ḳhamosh

har suḳhan kī ab mire taqrīr hai

nazm mohsin kī rahī sar-mashq der

is mire bhī sher meñ tāsīr hai

mar ga.e par bhī na rusvā.ī ga.ī

shahr meñ ab na.ash bhī tash.hīr hai

kyā sitam hai ye ki hote teġh-o-tasht

zab.h karne meñ mire tāḳhīr hai

'mīr' ko hai kyā javānī meñ salāh

ab to saare mai-kade kā piir hai

jo junun-o-ishq ki tadbir hai

so na yan shamshir nai zanjir hai

wasf us ka bagh mein karna na tha

gul hamara ab gareban-gir hai

dekh rahta hai jo dekhe hai use

dilruba aaina-ru taswir hai

pae-gir us ke na hon kyon dard-mand

halqa halqa zulf wo zanjir hai

said ke tan par hain sab gulha-e-zaKHm

kis qadar KHush-kar us ka tir hai

muddat-e-hijran ne ki nai kuchh kami

mere tul-e-umr ki taqsir hai

KHat na likhte the so tab-e-dil gai

daftaron ki aksar ab tahrir hai

rakh nazar mein bhi KHarab aabaadiyan

ai ki tujh ko kuchh gham-e-tamir hai

saKHt kafir hain barahman-zad-gan

muslimon ki un ke han takfir hai

guftugu mein rahte the aage KHamosh

har suKHan ki ab mere taqrir hai

nazm mohsin ki rahi sar-mashq der

is mere bhi sher mein tasir hai

mar gae par bhi na ruswai gai

shahr mein ab nash bhi tashhir hai

kya sitam hai ye ki hote tegh-o-tasht

zabh karne mein mere taKHir hai

'mir' ko hai kya jawani mein salah

ab to sare mai-kade ka pir hai