kab se sohbat bigaD rahi hai kyunkar koi banawe ab

kab se sohbat bigaḌ rahī hai kyūñkar koī banāve ab

nāz-o-niyāz kā jhagḌā aisā kis ke kane le jaave ab

sau chitte aate haiñ jī meñ pagḌī par gul rakkhe se

kis ko dimāġh rahā hai us ke jo harf-e-ḳhashin uThāve ab

teġh buland huī hai us kī qismat hoñge zaḳhm-e-rasā

mard agar hai said-e-haram to koī jarāhat khāve ab

daaġh sar-o-sīne ke mere hasrat-āgīñ chashm hue

dekheñ kyā kyā ‘ishq-e-sitam-kash ham logoñ ko dikhāve ab

dam do-dam ghabrāhaT ho to ho saktā hai tadāruk bhī

jī kī chaal se paidā hai so koī ghaḌī meñ jaave ab

dil ke daaġh bhī gul haiñ lekin dil kī tasallī hotī nahīñ

kāshke do gul-barg udhar se baav uḌā kar laave ab

us ke kafak kī pāmālī meñ dil jo gayā thā shāyad 'mīr'

yaar idhar ho maa.il Tuk to vo rafta haath aave ab

kab se sohbat bigaD rahi hai kyunkar koi banawe ab

naz-o-niyaz ka jhagDa aisa kis ke kane le jawe ab

sau chitte aate hain ji mein pagDi par gul rakkhe se

kis ko dimagh raha hai us ke jo harf-e-KHashin uThawe ab

tegh buland hui hai us ki qismat honge zaKHm-e-rasa

mard agar hai said-e-haram to koi jarahat khawe ab

dagh sar-o-sine ke mere hasrat-agin chashm hue

dekhen kya kya ‘ishq-e-sitam-kash hum logon ko dikhawe ab

dam do-dam ghabrahaT ho to ho sakta hai tadaruk bhi

ji ki chaal se paida hai so koi ghaDi mein jawe ab

dil ke dagh bhi gul hain lekin dil ki tasalli hoti nahin

kashke do gul-barg udhar se baw uDa kar lawe ab

us ke kafak ki pamali mein dil jo gaya tha shayad 'mir'

yar idhar ho mail Tuk to wo rafta hath aawe ab