kaho to kab tain yun sath tere pyar rahe

kaho to kab ta.iiñ yuuñ saath tere pyaar rahe

ki dekhā jab tujhe tab jī ko maar maar rahe

adā-o-nāz se dil le chalā to hañs ke kahā

ki mere paas tumhārā bhī yādgār rahe

ham aap se jo ga.e haiñ ga.e haiñ muddat ke

ilāhī apnā hameñ kab tak intizār rahe

havas asīroñ ke Tuk dil kī nikle kuchh shāyad

koī din aur agar mausam-e-bahār rahe

uThā jo baaġh se maiñ be-dimāġh to na phirā

hazār murġh-e-gulistāñ mujhe pukār rahe

liyā to jaave bhalā naam muñh se yaarī kā

jo ham sitam-zadoñ se yaar kuchh bhī yaar rahe

visāl hijr Thahar jaave kuchh na kuchh āḳhir

jo be-qarār mire dil ko bhī qarār rahe

kareñge chhātī ko gulzār ham jalā kar daaġh

jo gul ke siine meñ aisā hī ḳhār-ḳhār rahe

takūñ huuñ ek sā maiñ gard-e-rāh ko us kī

na kyūñke donoñ mirī āñkhoñ meñ ġhubār rahe

na kariye girya-e-be-iḳhtiyār hargiz 'mīr'

jo ishq karne meñ dil par kuchh iḳhtiyār rahe

kaho to kab tain yun sath tere pyar rahe

ki dekha jab tujhe tab ji ko mar mar rahe

ada-o-naz se dil le chala to hans ke kaha

ki mere pas tumhaara bhi yaadgar rahe

hum aap se jo gae hain gae hain muddat ke

ilahi apna hamein kab tak intizar rahe

hawas asiron ke Tuk dil ki nikle kuchh shayad

koi din aur agar mausam-e-bahaar rahe

uTha jo bagh se main be-dimagh to na phira

hazar murgh-e-gulistan mujhe pukar rahe

liya to jawe bhala nam munh se yari ka

jo hum sitam-zadon se yar kuchh bhi yar rahe

visal hijr Thahar jawe kuchh na kuchh aaKHir

jo be-qarar mere dil ko bhi qarar rahe

karenge chhati ko gulzar hum jala kar dagh

jo gul ke sine mein aisa hi KHar-KHar rahe

takun hun ek sa main gard-e-rah ko us ki

na kyunke donon meri aankhon mein ghubar rahe

na kariye girya-e-be-iKHtiyar hargiz 'mir'

jo ishq karne mein dil par kuchh iKHtiyar rahe