کہو تو کب تئیں یوں ساتھ تیرے پیار رہے

کہو تو کب تئیں یوں ساتھ تیرے پیار رہے

کہ دیکھا جب تجھے تب جی کو مار مار رہے

ادا و ناز سے دل لے چلا تو ہنس کے کہا

کہ میرے پاس تمہارا بھی یادگار رہے

ہم آپ سے جو گئے ہیں گئے ہیں مدت کے

الٰہی اپنا ہمیں کب تک انتظار رہے

ہوس اسیروں کے ٹک دل کی نکلے کچھ شاید

کوئی دن اور اگر موسم بہار رہے

اٹھا جو باغ سے میں بے دماغ تو نہ پھرا

ہزار مرغ گلستاں مجھے پکار رہے

لیا تو جاوے بھلا نام منہ سے یاری کا

جو ہم ستم زدوں سے یار کچھ بھی یار رہے

وصال ہجر ٹھہر جاوے کچھ نہ کچھ آخر

جو بے قرار مرے دل کو بھی قرار رہے

کریں گے چھاتی کو گلزار ہم جلا کر داغ

جو گل کے سینے میں ایسا ہی خار خار رہے

تکوں ہوں ایک سا میں گرد راہ کو اس کی

نہ کیونکے دونوں مری آنکھوں میں غبار رہے

نہ کریے گریۂ بے اختیار ہرگز میرؔ

جو عشق کرنے میں دل پر کچھ اختیار رہے