kahta hai kaun mir ki be-iKHtiyar ro

kahtā hai kaun 'mīr' ki be-iḳhtiyār ro

aisā tū ro ki rone pe tere hañsī na ho

paayā gayā vo gauhar-e-nāyāb sahl kab

niklā hai us ko DhūñDne to pahle jaan kho

kaam us ke lab se hai mujhe bint-ul-inab se kyā

hai āb-e-zindagī bhī to le jaa.e murda-sho

sunte nahīñ kahe jo na kahiye to dam ruke

kuchh pochhiye na qissa hamārā hai go-mago

mash'ar hai be-dimāġhī pe mutlaq na bolnā

ham deñ tumheñ duā hameñ tum gāliyāñ to do

karnā jigar zarūr hai dil dād-gāñ ko bhī

vo boltā nahīñ to tum aaphī se chheḌ lo

ai ġhāfilān-e-dahr ye kuchh raah kī hai baat

chalne ko qāfile haiñ yahāñ tum rahe ho so

gardish meñ jo koī ho rakhe us se kyā umiid

din raat aaphī charḳh meñ hai āsmān to

jab dekhte haiñ paañv hī daabo ho us ke 'mīr'

kyoñ hote ho zalīl tum itnā to mat dabo

kahta hai kaun 'mir' ki be-iKHtiyar ro

aisa tu ro ki rone pe tere hansi na ho

paya gaya wo gauhar-e-nayab sahl kab

nikla hai us ko DhunDne to pahle jaan kho

kaam us ke lab se hai mujhe bint-ul-inab se kya

hai aab-e-zindagi bhi to le jae murda-sho

sunte nahin kahe jo na kahiye to dam ruke

kuchh pochhiye na qissa hamara hai go-mago

mash'ar hai be-dimaghi pe mutlaq na bolna

hum den tumhein dua hamein tum galiyan to do

karna jigar zarur hai dil dad-gan ko bhi

wo bolta nahin to tum aaphi se chheD lo

ai ghafilan-e-dahr ye kuchh rah ki hai baat

chalne ko qafile hain yahan tum rahe ho so

gardish mein jo koi ho rakhe us se kya umid

din raat aaphi charKH mein hai aasman to

jab dekhte hain panw hi dabo ho us ke 'mir'

kyon hote ho zalil tum itna to mat dabo