کہتا ہے کون تجھ کو یاں یہ نہ کر تو وہ کر

کہتا ہے کون تجھ کو یاں یہ نہ کر تو وہ کر

پر ہو سکے جو پیارے دل میں بھی ٹک جگہ کر

وہ تنگ پوش اک دن دامن کشاں گیا تھا

رکھی ہیں جا نمازیں اہل ورع نے تہ کر

کیا قصر دل کی تم سے ویرانی نقل کریے

ہو ہو گئے ہیں ٹیلے سارے مکان ڈھ کر

ہم اپنی آنکھوں کب تک یہ رنگ عشق دیکھیں

آنے لگا ہے لوہو رخسار پر تو بہ کر

رنگ شکستہ اپنا بے لطف بھی نہیں ہے

یاں کی تو صبح دیکھے اک آدھ رات رہ کر

برسوں عذاب دیکھے قرنوں تعب اٹھائے

یہ دل حزیں ہوا ہے کیا کیا جفائیں سہ کر

ایکوں کی کھال کھینچی ایکوں کو دار کھینچا

اسرار عاشقی کا پچھتائے یار کہہ کر

طاعت کوئی کرے ہے جب ابر زور جھومے

گر ہو سکے تو زاہد اس وقت میں گنہ کر

کیوں تو نے آخر آخر اس وقت منہ دکھایا

دی جان میرؔ نے جو حسرت سے اک نگہ کر