kaise nahs dinon mein ya-rab maine us se mohabbat ki

kaise nahs dinoñ meñ yā-rab maiñ ne us se mohabbat kī

dhuum rahī hai sar par mere ranj-o-itāb-o-kulfat kī

maiñ to sarv-o-shāḳh-e-gul kī qat.a hī kā dīvāna thā

yaar ne qad qāmat dikhlā kar sar par mere qayāmat kī

qismat meñ jo kuchh ki bidā ho dete haiñ vo hī insāñ ko

ġham ġhussa hī ham ko milā hai ḳhūbī apnī qismat kī

ḳhalvat-e-yār hai aalam aalam ek nahīñ hai ham ko baar

dar par jā kar phir aate haiñ ḳhuub hamārī izzat kī

ik gardan se sau haq bāñdhe kyā kyā kariye hoñ jo adā

muddat us par ek nafas jūñ-sub.h hamārī fursat kī

sheva us kā qahr-o-ġhazab hai nāz-o-ḳhashm-o-sitam ve sab

koī nigāh-e-lutf agar kī un ne ham se muravvat kī

be-parvā.ī darveshī kī thoḌī thoḌī tab aa.ī

jab ki faqīrī ke uupar maiñ ḳharch baḌī sī daulat kī

nāz-o-ḳhashm kā rutba kaisā haT kis a.alā darje meñ

baat hamārī ek na maanī barsoñ ham ne minnat kī

dakhkhin pūrab pachchhim se log aakar mujh ko dekheñ haiñ

haif ki parvā tum ko nahīñ hai mutlaq merī sohbat kī

dostī yaarī ulfat-e-bāham ahd meñ us ke rasm nahīñ

ye jaane haiñ mehr-o-vafā ik baat hai goyā muddat kī

āb-e-hasrat āñkhoñ meñ us kī naumīdāna phirtā thā

'mīr' ne shāyad ḳhvāhish dil kī aaj koī phir ruḳhsat kī

kaise nahs dinon mein ya-rab main ne us se mohabbat ki

dhum rahi hai sar par mere ranj-o-itab-o-kulfat ki

main to sarw-o-shaKH-e-gul ki qata hi ka diwana tha

yar ne qad qamat dikhla kar sar par mere qayamat ki

qismat mein jo kuchh ki bida ho dete hain wo hi insan ko

gham ghussa hi hum ko mila hai KHubi apni qismat ki

KHalwat-e-yar hai aalam aalam ek nahin hai hum ko bar

dar par ja kar phir aate hain KHub hamari izzat ki

ek gardan se sau haq bandhe kya kya kariye hon jo ada

muddat us par ek nafas jun-subh hamari fursat ki

shewa us ka qahr-o-ghazab hai naz-o-KHashm-o-sitam we sab

koi nigah-e-lutf agar ki un ne hum se murawwat ki

be-parwai darweshi ki thoDi thoDi tab aai

jab ki faqiri ke upar main KHarch baDi si daulat ki

naz-o-KHashm ka rutba kaisa haT kis aala darje mein

baat hamari ek na mani barson hum ne minnat ki

dakhkhin purab pachchhim se log aakar mujh ko dekhen hain

haif ki parwa tum ko nahin hai mutlaq meri sohbat ki

dosti yari ulfat-e-baham ahd mein us ke rasm nahin

ye jaane hain mehr-o-wafa ek baat hai goya muddat ki

aab-e-hasrat aankhon mein us ki naumidana phirta tha

'mir' ne shayad KHwahish dil ki aaj koi phir ruKHsat ki