kaisi sai hawadis ne ki aaKHir-e-kar halak kiya

kaisī sa.ī havādis ne kī āḳhir-e-kār halāk kiyā

kyā kyā charḳh ne chakkar maare piis ke mujh ko ḳhaak kiyā

aisā palīd ālūda-e-duniyā ḳhalq na aage huā hogā

shaiḳh-e-shahr muā kahte haiñ shahr ḳhudā ne paak kiyā

qudrat-e-haq meñ kyā qudrat jo daḳhl kisū kī fuzūlī kare

us ko kiyā parkāla-e-ātish mujh ko ḳhas-o-ḳhāshāk kiyā

aah se the raḳhne chhātī meñ phailnā un kā ye sahl na thā

do do haath taḌap kar dil ne sīna-e-āshiq chaak kiyā

ḳhūgar honā huzn-o-bukā se 'mīr' hamārā yūñhī nahīñ

barsoñ rote kuḌhte rahe ham tab dil ko ġhamnāk kiyā

kaisi sai hawadis ne ki aaKHir-e-kar halak kiya

kya kya charKH ne chakkar mare pis ke mujh ko KHak kiya

aisa palid aaluda-e-duniya KHalq na aage hua hoga

shaiKH-e-shahr mua kahte hain shahr KHuda ne pak kiya

qudrat-e-haq mein kya qudrat jo daKHl kisu ki fuzuli kare

us ko kiya parkala-e-atish mujh ko KHas-o-KHashak kiya

aah se the raKHne chhati mein phailna un ka ye sahl na tha

do do hath taDap kar dil ne sina-e-ashiq chaak kiya

KHugar hona huzn-o-buka se 'mir' hamara yunhi nahin

barson rote kuDhte rahe hum tab dil ko ghamnak kiya