kal dil-azurda gulistan se guzar humne kiya

kal dil-āzurda gulistāñ se guzar ham ne kiyā

gul lage kahne kaho muñh na udhar ham ne kiyā

kar ga.ī ḳhvāb se bedār tumheñ sub.h kī baav

be-dimāġh itne jo ho ham pe magar ham ne kiyā

sīdhe talvār ke muñh par tirī ham aa.e chale

kyā kareñ is dil-e-ḳhasta ko sipar ham ne kiyā

nīmcha haath meñ mastī se lahū sī āñkheñ

saj tirī dekh ke ai shoḳh hazar ham ne kiyā

paañv ke nīche kī miTTī bhī na hogī ham sī

kyā kaheñ umr ko is tarah basar ham ne kiyā

khā gayā nāḳhun-e-sar-tez jigar dil donoñ

raat kī sīna-ḳharāshī meñ hunar ham ne kiyā

kaam in hoñToñ se vo le jo koī ham sā ho

dekhte dekhte hī āñkhoñ meñ ghar ham ne kiyā

jaise hasrat liye jaatā hai jahāñ se koī

aah yuuñ kūcha-e-dilbar se safar ham ne kiyā

baare kal Thahr ga.e zālim-e-ḳhuñḳhār se ham

munsifī kiije to kuchh kam na jigar ham ne kiyā

us ruḳh-o-zulf kī tasbīh hai yaañ aksar 'mīr'

vird apnā yahī ab shām-o-sahar ham ne kiyā

kal dil-azurda gulistan se guzar hum ne kiya

gul lage kahne kaho munh na udhar hum ne kiya

kar gai KHwab se bedar tumhein subh ki baw

be-dimagh itne jo ho hum pe magar hum ne kiya

sidhe talwar ke munh par teri hum aae chale

kya karen is dil-e-KHasta ko sipar hum ne kiya

nimcha hath mein masti se lahu si aankhen

saj teri dekh ke ai shoKH hazar hum ne kiya

panw ke niche ki miTTi bhi na hogi hum si

kya kahen umr ko is tarah basar hum ne kiya

kha gaya naKHun-e-sar-tez jigar dil donon

raat ki sina-KHarashi mein hunar hum ne kiya

kaam in honTon se wo le jo koi hum sa ho

dekhte dekhte hi aankhon mein ghar hum ne kiya

jaise hasrat liye jata hai jahan se koi

aah yun kucha-e-dilbar se safar hum ne kiya

bare kal Thahr gae zalim-e-KHunKHar se hum

munsifi kije to kuchh kam na jigar hum ne kiya

us ruKH-o-zulf ki tasbih hai yan aksar 'mir'

wird apna yahi ab sham-o-sahar hum ne kiya