kal raat ro ke subh talak main raha gira

kal raat ro ke sub.h talak maiñ rahā girā

ḳhūñ-bār merī āñkhoñ se kyā jānūñ kyā girā

ab shahr-e-ḳhush-imārat-e-dil kā hai kyā ḳhayāl

nāgāh aa ke ishq ne maarā jalā girā

kyā tai ho raah ishq kī āshiq ġharīb hai

mushkil-guzar tarīq hai yaañ rah girā girā

lāzim paḌī hai kasl-e-dilī ko fatādgī

bīmār-e-ishq rahtā hai aksar paḌā girā

Thahre na us ke ishq kā sar-gashta-o-za.īf

Thokar kahīñ lagī ki rahā sar-phirā girā

de mārne ko takiye se sar Tuk uThā to kyā

bistar se kab uThe hai ġham-e-ishq kā girā

phirtā thā 'mīr' ġham-zada yak umr se ḳharāb

ab shukr hai ki baare kisī dar pe jā girā

kal raat ro ke subh talak main raha gira

KHun-bar meri aankhon se kya jaanun kya gira

ab shahr-e-KHush-imarat-e-dil ka hai kya KHayal

nagah aa ke ishq ne mara jala gira

kya tai ho rah ishq ki aashiq gharib hai

mushkil-guzar tariq hai yan rah gira gira

lazim paDi hai kasl-e-dili ko fatadgi

bimar-e-ishq rahta hai aksar paDa gira

Thahre na us ke ishq ka sar-gashta-o-zaif

Thokar kahin lagi ki raha sar-phira gira

de marne ko takiye se sar Tuk uTha to kya

bistar se kab uThe hai gham-e-ishq ka gira

phirta tha 'mir' gham-zada yak umr se KHarab

ab shukr hai ki bare kisi dar pe ja gira