کل رات رو کے صبح تلک میں رہا گرا

کل رات رو کے صبح تلک میں رہا گرا

خوں بار میری آنکھوں سے کیا جانوں کیا گرا

اب شہر خوش عمارت دل کا ہے کیا خیال

ناگاہ آ کے عشق نے مارا جلا گرا

کیا طے ہو راہ عشق کی عاشق غریب ہے

مشکل گزر طریق ہے یاں رہ گرا گرا

لازم پڑی ہے کسل دلی کو فتادگی

بیمار عشق رہتا ہے اکثر پڑا گرا

ٹھہرے نہ اس کے عشق کا سرگشتہ و ضعیف

ٹھوکر کہیں لگی کہ رہا سر پھرا گرا

دے مارنے کو تکیے سے سر ٹک اٹھا تو کیا

بستر سے کب اٹھے ہے غم عشق کا گرا

پھرتا تھا میرؔ غم زدہ یک عمر سے خراب

اب شکر ہے کہ بارے کسی در پہ جا گرا