karta hun allah allah darwesh hun sada ka

kartā huuñ allah allah darvesh huuñ sadā kā

sarmāya-e-tavakkul yaañ naam hai ḳhudā kā

maiñ ne nikal junūñ se mashq-e-qalandarī kī

zanjīr-e-sar huā hai thā silsila jo pā kā

yārab hamārī jānib ye sang kyoñ hai 'aa.ed

jī hī se mārte haiñ jo naam le vafā kā

kyā faqr meñ guzar ho chashm-e-tama' siiye bin

hai raah tang aisī jaise suī kā naakā

abr aur josh-e-gul hai chal ḳhānqah se suufī

hai lutf mai-kade meñ dah-chand is havā kā

ham vahshiyoñ se muddat mānūs jo rahe haiñ

majnūñ ko shoḳh laḌke kahne lage haiñ kaakā

ālūda ḳhuuñ se nāḳhun haiñ sher ke se har-sū

jangal meñ chal bane to phūlā hai zor Dhāka

ye do hī sūrateñ haiñ yā mun'akis hai 'ālam

yā 'ālam aa.ina hai us yār-e-ḳhud-numā kā

kyā maiñ hī jāñ-ba-lab huuñ bīmārī-e-dilī se

maarā huā hai 'ālam is dard-e-be-davā kā

zulf-e-siyāh us kī rahtī hai chit-chaḌhī hī

maiñ mubtalā huā huuñ ai vaa.e kis balā kā

ġhairat se tang aa.e ġhairoñ se laḌ mareñge

aage bhī 'mīr' sayyad karte ga.e haiñ saakā

karta hun allah allah darwesh hun sada ka

sarmaya-e-tawakkul yan nam hai KHuda ka

main ne nikal junun se mashq-e-qalandari ki

zanjir-e-sar hua hai tha silsila jo pa ka

yarab hamari jaanib ye sang kyon hai 'aed

ji hi se marte hain jo nam le wafa ka

kya faqr mein guzar ho chashm-e-tama' siye bin

hai rah tang aisi jaise sui ka naka

abr aur josh-e-gul hai chal KHanqah se sufi

hai lutf mai-kade mein dah-chand is hawa ka

hum wahshiyon se muddat manus jo rahe hain

majnun ko shoKH laDke kahne lage hain kaka

aaluda KHun se naKHun hain sher ke se har-su

jangal mein chal bane to phula hai zor Dhaka

ye do hi suraten hain ya mun'akis hai 'alam

ya 'alam aaina hai us yar-e-KHud-numa ka

kya main hi jaan-ba-lab hun bimari-e-dili se

mara hua hai 'alam is dard-e-be-dawa ka

zulf-e-siyah us ki rahti hai chit-chaDhi hi

main mubtala hua hun ai wae kis bala ka

ghairat se tang aae ghairon se laD marenge

aage bhi 'mir' sayyad karte gae hain saka