کون کہتا ہے منہ کو کھولو تم

کون کہتا ہے منہ کو کھولو تم

کاشکے پردے ہی میں بولو تم

حکم آب رواں رکھے ہے حسن

بہتے دریا میں ہاتھ دھو لو تم

کیا سراہیں ہم اپنی جنس کو لیک

دل عجب ہے متاع جو لو تم

جانا آیا ہے اب جہاں سے ہمیں

تھوڑی تو دور ساتھ ہو لو تم

جب میسر ہو بوسہ اس لب کا

چپکے ہی ہو رہو نہ بولو تم

پنجہ مرجاں کا پھر دھرا ہی رہے

ہاتھ خوں میں مرے ڈبو لو تم

دست دے ہے کسے پلک سی میل

دل جہاں پاؤ اب پرو لو تم

آتے ہیں متصل چلے آنسو

آہ کب تک یہ موتی رولو تم

رات گزری ہے سب تڑپتے میرؔ

آنکھ لگ جائے ٹک تو سو لو تم