KHun na hua dil chahiye jaisa go ab kaam se jawega

ḳhuuñ na huā dil chāhiye jaisā go ab kaam se jāvegā

kaam apne vo kyā aaya jo kaam hamāre āvegā

āñkheñ lagī rahtī haiñ aksar chāk-e-qafas se asīroñ kī

jhoñkā bād-e-bahārī kā gul-barg koī yaañ lāvegā

fitne kitne jam.a hue haiñ zulf-o-ḳhāl-o-ḳhadd-o-qad

koī na koī ahd meñ mere sar in meñ se uThāvegā

ishq meñ tere kyā kyā sun kar yaar ga.ī kar jaate haiñ

ya.anī ġham khāte haiñ bahut ham ġham bhī ham ko khāvegā

ek nigah kī umiid bhī us kī chashm-e-shoḳh se ham ko nahīñ

īdhar ūdhar dekhe gā par ham se aañkh chhupāvegā

ab to javānī kā ye nasha hī be-ḳhud tujh ko rakkhegā

hosh gayā phir āvegā to der talak pachhtāvegā

der se is andeshe ne nākām rakhā hai 'mīr' hameñ

paañv chhueñge us ke ham to vo bhī haath lagāvegā

KHun na hua dil chahiye jaisa go ab kaam se jawega

kaam apne wo kya aaya jo kaam hamare aawega

aankhen lagi rahti hain aksar chaak-e-qafas se asiron ki

jhonka baad-e-bahaari ka gul-barg koi yan lawega

fitne kitne jama hue hain zulf-o-KHal-o-KHadd-o-qad

koi na koi ahd mein mere sar in mein se uThawega

ishq mein tere kya kya sun kar yar gai kar jate hain

yani gham khate hain bahut hum gham bhi hum ko khawega

ek nigah ki umid bhi us ki chashm-e-shoKH se hum ko nahin

idhar udhar dekhe ga par hum se aankh chhupawega

ab to jawani ka ye nasha hi be-KHud tujh ko rakkhega

hosh gaya phir aawega to der talak pachhtawega

der se is andeshe ne nakaam rakha hai 'mir' hamein

panw chhuenge us ke hum to wo bhi hath lagawega