koshish apni thi abas par ki bahut

koshish apnī thī abas par kī bahut

kyā kareñ ham chāhtā thā jī bahut

kāba-e-maqsūd ko pahuñche na haa.e

sa.ī kī ai shaiḳh ham ne bhī bahut

sab tire mahv-e-duā-e-jān haiñ

aarzū apnī bhī hai tū jī bahut

ruk rahā hai der se taḌpā nahīñ

ishq ne kyoñ dil ko mohlat dī bahut

kyoñ na hoñ duurī meñ ham nazdīk-e-marg

dil ko us ke saath ulfat thī bahut

vo na chāhe jab ta.iiñ hotā hai kyā

jehd kī milne meñ apnī sī bahut

kab sunā harf-e-shugūn-e-vasl-e-yār

yuuñ to fāl-e-gosh ham ne lī bahut

thā qavī āḳhir mile ham ḳhaak meñ

āsmāñ se yuuñ rahī kushtī bahut

aaj darham karte the kuchh guftugū

'mīr' ne shāyad ki daarū pī bahut

koshish apni thi abas par ki bahut

kya karen hum chahta tha ji bahut

kaba-e-maqsud ko pahunche na hae

sai ki ai shaiKH hum ne bhi bahut

sab tere mahw-e-dua-e-jaan hain

aarzu apni bhi hai tu ji bahut

ruk raha hai der se taDpa nahin

ishq ne kyon dil ko mohlat di bahut

kyon na hon duri mein hum nazdik-e-marg

dil ko us ke sath ulfat thi bahut

wo na chahe jab tain hota hai kya

jehd ki milne mein apni si bahut

kab suna harf-e-shugun-e-wasl-e-yar

yun to fal-e-gosh hum ne li bahut

tha qawi aaKHir mile hum KHak mein

aasman se yun rahi kushti bahut

aaj darham karte the kuchh guftugu

'mir' ne shayad ki daru pi bahut