kya kahiye kuchh ban nahin aati jangal jangal ho aae

kyā kahiye kuchh ban nahīñ aatī jangal jangal ho aa.e

chhāñh meñ jā ke babūloñ kī ham ishq-o-junūñ ko ro aa.e

dil kī talāsh meñ uTh ke ga.e the shāyad yaañ paidā ho so

jaan kā apnī girāmī gauhar us kī galī meñ kho aa.e

āhū-e-irfāñ said unhoñ kā gar na huā nuqsān kiyā

us aalam se is aalam meñ kasb-e-kamāl ko jo aa.e

kuchh kahne kā maqām na thā vo vā hotā to kahte kuchh

aanā na aanā yaksāñ thā vaañ hote udhar ham go aa.e

sab kahte the chain karegā kuchh bhī na dekhā juz saḳhtī

patthar rakh ke sirhāne ham Tuk us kī galī meñ so aa.e

kyā hī dāman-gīr thī yā-rab ḳhāk-e-bismil-gāh-e-vafā

us zālim kī teġh tale se ek gayā to do aa.e

sar denā Thahrā kar ham ne paañv ko bāhar rakkhā thā

har-sū ho dushvār hai phirnā 'mīr' idhar ab to aa.e

kya kahiye kuchh ban nahin aati jangal jangal ho aae

chhanh mein ja ke babulon ki hum ishq-o-junun ko ro aae

dil ki talash mein uTh ke gae the shayad yan paida ho so

jaan ka apni girami gauhar us ki gali mein kho aae

aahu-e-irfan said unhon ka gar na hua nuqsan kiya

us aalam se is aalam mein kasb-e-kamal ko jo aae

kuchh kahne ka maqam na tha wo wa hota to kahte kuchh

aana na aana yaksan tha wan hote udhar hum go aae

sab kahte the chain karega kuchh bhi na dekha juz saKHti

patthar rakh ke sirhane hum Tuk us ki gali mein so aae

kya hi daman-gir thi ya-rab KHak-e-bismil-gah-e-wafa

us zalim ki tegh tale se ek gaya to do aae

sar dena Thahra kar hum ne panw ko bahar rakkha tha

har-su ho dushwar hai phirna 'mir' idhar ab to aae