kya karun saudai uski zulf ki tadbir main

kyā karūñ saudā.ī us kī zulf kī tadbīr maiñ

zill-e-mamdūd-e-chaman meñ huuñ magar zanjīr maiñ

gul to mujh hairān kī ḳhātir bahut kartā hai lek

vā nahīñ hotā ba-rang-e-ġhuncha-e-tasvīr maiñ

rū-ba-rū us ke ga.e ḳhāmosh ho jaatā huuñ kuchh

kis se apne chupke rahne kī karūñ taqrīr maiñ

tan-badan meñ dil kī garmī ne lagā rakkhī hai aag

'ishq kī to hai javānī ho gayā go piir maiñ

ho agar ḳhūñrez kā apne sabab to kuchh kaho

vo sitamgar hai muqarrar aur be-taqsīr maiñ

be-dimāġhī shor-e-shab se yaar ko duunī huī

dekhī bas is be-sarāyat naale kī tāsīr maiñ

kuchh nahīñ pūchhā hai mujh se juz-hadīs-e-rū-e-yār

haath bulbul ke lagā huuñ baaġh meñ jab 'mīr' maiñ

kya karun saudai us ki zulf ki tadbir main

zill-e-mamdud-e-chaman mein hun magar zanjir main

gul to mujh hairan ki KHatir bahut karta hai lek

wa nahin hota ba-rang-e-ghuncha-e-taswir main

ru-ba-ru us ke gae KHamosh ho jata hun kuchh

kis se apne chupke rahne ki karun taqrir main

tan-badan mein dil ki garmi ne laga rakkhi hai aag

'ishq ki to hai jawani ho gaya go pir main

ho agar KHunrez ka apne sabab to kuchh kaho

wo sitamgar hai muqarrar aur be-taqsir main

be-dimaghi shor-e-shab se yar ko duni hui

dekhi bas is be-sarayat nale ki tasir main

kuchh nahin puchha hai mujh se juz-hadis-e-ru-e-yar

hath bulbul ke laga hun bagh mein jab 'mir' main