kya kuchh humse zid hai tumko baat hamari uDa do ho

kyā kuchh ham se zid hai tum ko baat hamārī uḌā do ho

lag paḌte haiñ ham tum se to tum auroñ ko lagā do ho

kyā roveñ qadr-o-qīmat ko yahīñ se hai mā'lūm hameñ

kaam hamārā paas tumhāre jo aatā hai bahā do ho

itnī to jā ḳhālī rahī hai bazm-e-ḳhush meñ tumhāre sivā

jin ko kahīñ jāgah nahīñ miltī pahlū meñ un ko jā do ho

zang to jaave dil se hamāre ġhair siyah-rū bad-go ke

khīñch ke to ek aisī lagāo teġh sitam kī tā do ho

sohbat garm hamārī tumhārī sham' patange kī sī hai

yā'nī ho dil-soz jo koī us ko tum to jalā do ho

rang-e-sohbat kis ko dikhāveñ ḳhūbī apnī qismat kī

sāġhar-e-mai dushman ko do ho ham ko zahr mañgā do ho

band nahīñ jo karte ho tum siine ke sūrāḳhoñ ko

jī kī rukan meñ in raḳhnoñ se shāyad dil ko havā do ho

aañkh jhapak jaatī nahīñ tanhā aage chehra-e-raushan ke

maah bhī baiThā jaatā hai jab muñh se naqāb uThā do ho

ġhair se ġhairiyyat hai āsāñ lekin tah kuchh ham ko nahīñ

baat batāveñ kyā ham tum ko tum ham ko to banā do ho

'mīr' haqārat se ham apnī chup rah jaate haiñ jān-jale

tuul hamāre ghuTne ko de kar jaise charāġh baḌhā do ho

kya kuchh hum se zid hai tum ko baat hamari uDa do ho

lag paDte hain hum tum se to tum auron ko laga do ho

kya rowen qadr-o-qimat ko yahin se hai ma'lum hamein

kaam hamara pas tumhaare jo aata hai baha do ho

itni to ja KHali rahi hai bazm-e-KHush mein tumhaare siwa

jin ko kahin jagah nahin milti pahlu mein un ko ja do ho

zang to jawe dil se hamare ghair siyah-ru bad-go ke

khinch ke to ek aisi lagao tegh sitam ki ta do ho

sohbat garm hamari tumhaari sham' patange ki si hai

ya'ni ho dil-soz jo koi us ko tum to jala do ho

rang-e-sohbat kis ko dikhawen KHubi apni qismat ki

saghar-e-mai dushman ko do ho hum ko zahr manga do ho

band nahin jo karte ho tum sine ke suraKHon ko

ji ki rukan mein in raKHnon se shayad dil ko hawa do ho

aankh jhapak jati nahin tanha aage chehra-e-raushan ke

mah bhi baiTha jata hai jab munh se naqab uTha do ho

ghair se ghairiyyat hai aasan lekin tah kuchh hum ko nahin

baat batawen kya hum tum ko tum hum ko to bana do ho

'mir' haqarat se hum apni chup rah jate hain jaan-jale

tul hamare ghuTne ko de kar jaise charagh baDha do ho