کیا کچھ ہم سے ضد ہے تم کو بات ہماری اڑا دو ہو

کیا کچھ ہم سے ضد ہے تم کو بات ہماری اڑا دو ہو

لگ پڑتے ہیں ہم تم سے تو تم اوروں کو لگا دو ہو

کیا روویں قدر و قیمت کو یہیں سے ہے معلوم ہمیں

کام ہمارا پاس تمہارے جو آتا ہے بہا دو ہو

اتنی تو جا خالی رہی ہے بزم خوش میں تمہارے سوا

جن کو کہیں جاگہ نہیں ملتی پہلو میں ان کو جا دو ہو

زنگ تو جاوے دل سے ہمارے غیر سیہ رو بد گو کے

کھینچ کے تو ایک ایسی لگاؤ تیغ ستم کی تا دو ہو

صحبت گرم ہماری تمہاری شمع پتنگے کی سی ہے

یعنی ہو دل سوز جو کوئی اس کو تم تو جلا دو ہو

رنگ صحبت کس کو دکھاویں خوبی اپنی قسمت کی

ساغر مے دشمن کو دو ہو ہم کو زہر منگا دو ہو

بند نہیں جو کرتے ہو تم سینے کے سوراخوں کو

جی کی رکن میں ان رخنوں سے شاید دل کو ہوا دو ہو

آنکھ جھپک جاتی نہیں تنہا آگے چہرۂ روشن کے

ماہ بھی بیٹھا جاتا ہے جب منہ سے نقاب اٹھا دو ہو

غیر سے غیریت ہے آساں لیکن تہ کچھ ہم کو نہیں

بات بتاویں کیا ہم تم کو تم ہم کو تو بنا دو ہو

میرؔ حقارت سے ہم اپنی چپ رہ جاتے ہیں جان جلے

طول ہمارے گھٹنے کو دے کر جیسے چراغ بڑھا دو ہو