کیا کیا جھمک گئے ہیں رخسار یار دونوں

کیا کیا جھمک گئے ہیں رخسار یار دونوں

رہ رہ گئے مہ و خور آئینہ وار دونوں

تصویر قیس و لیلیٰ ٹک ہاتھ لے کے دیکھو

کیسے ہیں عاشقی کے حیران کار دونوں

دست جنوں نے اب کے کپڑوں کی دھجیاں کیں

دامان و جیب میرے ہیں تار تار دونوں

پرسال کی سی بارش برسوں میں پھر ہوئی تھی

ابر اور دیدۂ تر روتے ہیں زار دونوں

دن ہیں بڑے کبھو کے راتیں بڑی کبھو کی

رہتے نہیں ہیں یکساں لیل و نہار دونوں

دل اور برق ابر و فصل گل ایک سے ہیں

یعنی کہ بیکلی سے ہیں بے قرار دونوں

خوش رنگ اشک خونیں گرتے رہے برابر

باغ و بہار ہیں اب جیب و کنار دونوں

اس شاخ گل سے قد کی کیا چوٹ لگ گئی ہے

جو دل جگر ہوئے ہیں خون ایک بار دونوں

چلتے جو اس کو دیکھا جی اپنے کھنچ گئے ہیں

ہم اور میرؔ یاں ہیں بے اختیار دونوں