lawe jhamakte ruKH ki aaina tab kyunkar

laave jhamakte ruḳh kī ā.īna taab kyūñkar

ho chehra us ke lab se yāqūt-e-nāb kyūñkar

hai sher-o-shā.erī go kab se shi.ār apnā

harf-o-suḳhan se kariye ab ijtināb kyūñkar

juuñ abr agar na roveñ vādī-o-koh par ham

to shahroñ shahroñ aave nahroñ meñ aab kyūñkar

ab bhī nahīñ hai ham ko ai ishq nā-umīdī

dekheñ ḳharāb hove hāl-e-ḳharāb kyūñkar

uḌ uḌ ke jā lage hai vo tīr-e-mār-e-kākul

khātā rahe na af.ī phir pech-tāb kyūñkar

chashme muhīt se jo hove na chashm-e-tar ke

to sair ho havā par phaile sahāb kyūñkar

ab to tapish ne dil kī ūdham machā rakhā hai

taskīn paave dekhūñ ye iztirāb kyūñkar

rū chāhiye hai us ke dar par bhī baiThne ko

ham to zalīl us ke hoñ 'mīr'-e-bāb kyūñkar

lawe jhamakte ruKH ki aaina tab kyunkar

ho chehra us ke lab se yaqut-e-nab kyunkar

hai sher-o-shaeri go kab se shiar apna

harf-o-suKHan se kariye ab ijtinab kyunkar

jun abr agar na rowen wadi-o-koh par hum

to shahron shahron aawe nahron mein aab kyunkar

ab bhi nahin hai hum ko ai ishq na-umidi

dekhen KHarab howe haal-e-KHarab kyunkar

uD uD ke ja lage hai wo tir-e-mar-e-kakul

khata rahe na afi phir pech-tab kyunkar

chashme muhit se jo howe na chashm-e-tar ke

to sair ho hawa par phaile sahab kyunkar

ab to tapish ne dil ki udham macha rakha hai

taskin pawe dekhun ye iztirab kyunkar

ru chahiye hai us ke dar par bhi baiThne ko

hum to zalil us ke hon 'mir'-e-bab kyunkar