liya chira-dasti se gar mir sar tak

liyā chīra-dastī se gar 'mīr' sar tak

na pahuñchā kabhū haath us kī kamar tak

mujhe niiñd kaisī ki mānind-e-anjum

khulī rahtī haiñ merī āñkheñ sahar tak

uThā paas be-iḳhtyārī se sab kā

bakā baiThe karte haiñ do do pahar tak

dimāġh aur dil haiñ sarāsīma donoñ

sar-e-zaḳhm shāyad ki pahuñchā jigar tak

balā shor-o-hangāma hai dil-zadoñ kā

qayāmat kiye jaa.e hai us ke ghar tak

na de māreñ chaukhaT se sar ko to kahiyo

rasā.ī huā chāhiye us ke dar tak

mohabbat meñ jī se ga.e 'mīr' āḳhir

ḳhabar guftanī hai ye har be-ḳhabar tak

liya chira-dasti se gar 'mir' sar tak

na pahuncha kabhu hath us ki kamar tak

mujhe nind kaisi ki manind-e-anjum

khuli rahti hain meri aankhen sahar tak

uTha pas be-iKHtyari se sab ka

baka baiThe karte hain do do pahar tak

dimagh aur dil hain sarasima donon

sar-e-zaKHm shayad ki pahuncha jigar tak

bala shor-o-hangama hai dil-zadon ka

qayamat kiye jae hai us ke ghar tak

na de maren chaukhaT se sar ko to kahiyo

rasai hua chahiye us ke dar tak

mohabbat mein ji se gae 'mir' aaKHir

KHabar guftani hai ye har be-KHabar tak