lutf hai kya anwa’-e-sitam jo uske koi bayan kare

lutf hai kyā anvā’-e-sitam jo us ke koī bayān kare

gosh-zad ik din hoveñ kahīñ to be-lutfī se zabān kare

ham to chaah kar us patthar ko saḳht nadāmat khīñchī hai

chaah kare ab vo koī jo chāhat kā armān kare

saude meñ dil ke naf' jo chāhe ḳhām-tama' saudā.ī hai

vārā-sārā 'ishq meñ kaisā jī kā bhī nuqsān kare

hashr ke hangāme meñ chāheñ dād-e-'ishq to husn nahīñ

kāshke yaañ vo zālim apne dil hī meñ dīvān kare

ātish-ḳhū maġhrūr se vaise ohda-barā kyā 'āshiq ho

dil ko jalāve minnat rakkhe jī maare ehsān kare

yumn-e-‘ishq-e-ġham-afzā se kaam nihāyat mushkil hai

ab bhī nahīñ naumīdī dil ko shāyad 'ishq āsān kare

kahne meñ ye baat aatī nahīñ ho sair ḳhudā kī qudrat kī

muuñd kar āñkheñ 'mīr' agar tū dil kī taraf Tuk dhyān kare

lutf hai kya anwa’-e-sitam jo us ke koi bayan kare

gosh-zad ek din howen kahin to be-lutfi se zaban kare

hum to chah kar us patthar ko saKHt nadamat khinchi hai

chah kare ab wo koi jo chahat ka arman kare

saude mein dil ke naf' jo chahe KHam-tama' saudai hai

wara-sara 'ishq mein kaisa ji ka bhi nuqsan kare

hashr ke hangame mein chahen dad-e-'ishq to husn nahin

kashke yan wo zalim apne dil hi mein diwan kare

aatish-KHu maghrur se waise ohda-bara kya 'ashiq ho

dil ko jalawe minnat rakkhe ji mare ehsan kare

yumn-e-‘ishq-e-gham-afza se kaam nihayat mushkil hai

ab bhi nahin naumidi dil ko shayad 'ishq aasan kare

kahne mein ye baat aati nahin ho sair KHuda ki qudrat ki

mund kar aankhen 'mir' agar tu dil ki taraf Tuk dhyan kare