mahmil-nashin hain kitne KHuddam-e-yar mein yan

mahmil-nashīñ haiñ kitne ḳhuddām-e-yār meñ yaañ

lailā kā ek naaqa so kis qatār meñ yaañ

sun shor kal qafas meñ dil daaġh sab huā hai

kyā phuul gul khile haiñ ab ke bahār meñ yaañ

kab rū-kashī ho merī rone meñ abr tujh se

dariyā bhare haiñ ek ik dāman ke taar meñ yaañ

tum to ga.e dikhā kar Tuk barq ke se jhamke

aaya bahut tafāvut sabr-o-qarār meñ yaañ

ham mar ga.e va-lekin soz-e-darūñ vahī hai

ek aag lag uThī hai kunj-e-mazār meñ yaañ

hijrāñ kī har ghaḌī hai sau sau baras ta.ab se

roz-e-shumār yaaro hai kis shumār meñ yaañ

jin rātoñ 'mīr' ham ko rone kā mashġhala thā

rahtā thā bahr-e-āzam so to kanār meñ yaañ

mahmil-nashin hain kitne KHuddam-e-yar mein yan

laila ka ek naqa so kis qatar mein yan

sun shor kal qafas mein dil dagh sab hua hai

kya phul gul khile hain ab ke bahaar mein yan

kab ru-kashi ho meri rone mein abr tujh se

dariya bhare hain ek ek daman ke tar mein yan

tum to gae dikha kar Tuk barq ke se jhamke

aaya bahut tafawut sabr-o-qarar mein yan

hum mar gae wa-lekin soz-e-darun wahi hai

ek aag lag uThi hai kunj-e-mazar mein yan

hijran ki har ghaDi hai sau sau baras tab se

roz-e-shumar yaro hai kis shumar mein yan

jin raaton 'mir' hum ko rone ka mashghala tha

rahta tha bahr-e-azam so to kanar mein yan