main jo nazar se uski gaya to wo sargarm-e-kar apna

maiñ jo nazar se us kī gayā to vo sargarm-e-kār apnā

kahne lagā chupkā sā ho kar haa.e dareġh shikār apnā

kyā yaarī kar duur phirā vo kyā kyā un ne fareb kiye

jis ke liye āvāra hue ham chhūTā shahr-o-dayār apnā

haath gale meñ un ne na Daalā maiñ ye galā jā kāTūñgā

ġham ġhusse se dekhiyo hūñgā aaphī gale kā haar apnā

chhātī pe saañp sā phir jaatā hai yaad meñ us ke bāloñ kī

jī meñ lahr aave hai lekin rahtā huuñ man maar apnā

baat kahī talvār nikālī aañkh laḌā.ī jī maare

kyūñke jatāve us se koī rabt mohabbat pyaar apnā

ham ne yaar vafādārī meñ kotāhī taqsīr na kī

kyā roveñ chāhat ke asar ko vo na huā Tuk yaar apnā

rahm kiyā kar lutf kiyā kar pūchh liyā kar āḳhir hai

'mīr' apnā ġham-ḳhvār apnā phir zaar apnā bīmār apnā

main jo nazar se us ki gaya to wo sargarm-e-kar apna

kahne laga chupka sa ho kar hae daregh shikar apna

kya yari kar dur phira wo kya kya un ne fareb kiye

jis ke liye aawara hue hum chhuTa shahr-o-dayar apna

hath gale mein un ne na Dala main ye gala ja kaTunga

gham ghusse se dekhiyo hunga aaphi gale ka haar apna

chhati pe sanp sa phir jata hai yaad mein us ke baalon ki

ji mein lahr aawe hai lekin rahta hun man mar apna

baat kahi talwar nikali aankh laDai ji mare

kyunke jatawe us se koi rabt mohabbat pyar apna

hum ne yar wafadari mein kotahi taqsir na ki

kya rowen chahat ke asar ko wo na hua Tuk yar apna

rahm kiya kar lutf kiya kar puchh liya kar aaKHir hai

'mir' apna gham-KHwar apna phir zar apna bimar apna