mar gaya main pa mere baqi hain aasar hanuz

mar gayā maiñ pa mire baaqī haiñ āsār hanūz

tar haiñ sab sar ke lahū se dar-o-dīvār hanūz

dil bhī pur-dāġh-chaman hai par ise kyā kiije

jī se jaatī hī nahīñ hasrat-e-dīdār hanūz

bah ga.e umr huī abr-e-bahārī ko vale

lahū barsā rahe haiñ dīda-e-ḳhūñ-bār hunūz

bad na le jā.iyo pūchhūñ huuñ tujhī se ye tabīb

bah huā koī bhī is dard kā bīmār hanūz

nā umīdī meñ to mar ga.e pa nahīñ ye ma.alūm

jiite haiñ kaun sī ummīd pe nā-chār hanūz

bārhā chal chukī talvār tirī chaal pe shoḳh

tū nahīñ chhoḌtā is tarz kī raftār hanūz

ek din bāl-fishāñ Tuk hue the ḳhush ho kar

haiñ ġham-e-dil kī asīrī meñ giraftār hanūz

koī to ābla-pā dasht-e-junūñ se guzrā

Duubā hī jaa.e hai lohū meñ sar-e-ḳhār hanūz

muntazir qatl ke va.ade kā huuñ apne ya.anī

jiitā marne ko rahā hai ye gunahgār hanūz

uḌ ga.e ḳhaak ho kitne hī tire kūche se

baaz aate nahīñ par tere havā-dār hanūz

qaaf

ek bhī zaḳhm kī jā jis ke na ho tan pe kahīñ

koī detā hai sunā vaise ko āzār hanūz

Tuk to insāf kar ai dushman-e-jān-e-āshiq

myaan se niklī paḌe hai tirī talvār hanūz

qaaf

'mīr' ko zo.af meñ maiñ dekh kahā kuchh kahiye

hai tujhe koī ghaḌī quvvat-e-guftār hanūz

abhī ik dam meñ zabāñ chalne se rah jaatī hai

dard-e-dil kyoñ nahīñ kartā hai tū iz.hār hanūz

aañsū bhar lā ke bahut huzn se ye kahne lagā

kyā kahūñ tujh ko samajh is pe nahīñ yaar hanūz

āñkhoñ meñ aan rahā jī jo nikaltā hī nahīñ

dil meñ mere hai girah hasrat-e-dīdār hanūz

mar gaya main pa mere baqi hain aasar hanuz

tar hain sab sar ke lahu se dar-o-diwar hanuz

dil bhi pur-dagh-chaman hai par ise kya kije

ji se jati hi nahin hasrat-e-didar hanuz

bah gae umr hui abr-e-bahaari ko wale

lahu barsa rahe hain dida-e-KHun-bar hunuz

bad na le jaiyo puchhun hun tujhi se ye tabib

bah hua koi bhi is dard ka bimar hanuz

na umidi mein to mar gae pa nahin ye malum

jite hain kaun si ummid pe na-chaar hanuz

barha chal chuki talwar teri chaal pe shoKH

tu nahin chhoDta is tarz ki raftar hanuz

ek din baal-fishan Tuk hue the KHush ho kar

hain gham-e-dil ki asiri mein giraftar hanuz

koi to aabla-pa dasht-e-junun se guzra

Duba hi jae hai lohu mein sar-e-KHar hanuz

muntazir qatl ke wade ka hun apne yani

jita marne ko raha hai ye gunahgar hanuz

uD gae KHak ho kitne hi tere kuche se

baz aate nahin par tere hawa-dar hanuz

qaf

ek bhi zaKHm ki ja jis ke na ho tan pe kahin

koi deta hai suna waise ko aazar hanuz

Tuk to insaf kar ai dushman-e-jaan-e-ashiq

myan se nikli paDe hai teri talwar hanuz

qaf

'mir' ko zoaf mein main dekh kaha kuchh kahiye

hai tujhe koi ghaDi quwwat-e-guftar hanuz

abhi ek dam mein zaban chalne se rah jati hai

dard-e-dil kyon nahin karta hai tu izhaar hanuz

aansu bhar la ke bahut huzn se ye kahne laga

kya kahun tujh ko samajh is pe nahin yar hanuz

aankhon mein aan raha ji jo nikalta hi nahin

dil mein mere hai girah hasrat-e-didar hanuz