mat puchho kuchh apni baaten kahiye to tumko nadamat ho

mat pūchho kuchh apnī bāteñ kahiye to tum ko nadāmat ho

qad-qāmat ye kuchh hai tumhārā lekin qahr qayāmat ho

rabt-iḳhlās ai dīda-o-dil bhī duniyā meñ ek se hotā hai

lag paḌte ho jis se tis se tum bhī koī malāmat ho

aaj sahar hote hī kuchh ḳhurshīd tire muñh aan chaḌhā

rok sake hai kaun ise sar jis ke aisī shāmat ho

chaah kā da.avā sab karte haiñ māniye kyūñkar be-āsār

ashk kī surḳhī zardī muñh kī ishq kī kuchh to alāmat ho

sarv-o-gul achchhe haiñ donoñ raunaq haiñ gulzār kī ek

chāhiye rū us kā sā rū ho qāmat vaisā qāmat ho

mil baiThe us naa.ī ke se koī ghaḌī jo zāhid to

jitne baal haiñ saare sar meñ vaisī hī us kī hajāmat ho

ho jo irāda yaañ rahne kā rah sakiye to rahiye aap

ham to chale jaate haiñ har dam kis ko qasd-e-iqāmat ho

kis muddat se duurī meñ terī ḳhāk-e-rah se barābar huuñ

kariye ranja-qadam Tuk mujh tak jo kuchh pās-e-qadāmat ho

muñh par us kī teġh-e-sitam ke sīdhā jaanā Thahrā hai

jiinā phir kajdār-o-marez is taur meñ ho Tuk yā mat ho

shor-o-shaġhab ko rātoñ ke hamsā.e tumhāre kyā roveñ

aise fitne kitne uTheñge 'mīr' jī tum jo salāmat ho

mat puchho kuchh apni baaten kahiye to tum ko nadamat ho

qad-qamat ye kuchh hai tumhaara lekin qahr qayamat ho

rabt-iKHlas ai dida-o-dil bhi duniya mein ek se hota hai

lag paDte ho jis se tis se tum bhi koi malamat ho

aaj sahar hote hi kuchh KHurshid tere munh aan chaDha

rok sake hai kaun ise sar jis ke aisi shamat ho

chah ka dawa sab karte hain maniye kyunkar be-asar

ashk ki surKHi zardi munh ki ishq ki kuchh to alamat ho

sarw-o-gul achchhe hain donon raunaq hain gulzar ki ek

chahiye ru us ka sa ru ho qamat waisa qamat ho

mil baiThe us nai ke se koi ghaDi jo zahid to

jitne baal hain sare sar mein waisi hi us ki hajamat ho

ho jo irada yan rahne ka rah sakiye to rahiye aap

hum to chale jate hain har dam kis ko qasd-e-iqamat ho

kis muddat se duri mein teri KHak-e-rah se barabar hun

kariye ranja-qadam Tuk mujh tak jo kuchh pas-e-qadamat ho

munh par us ki tegh-e-sitam ke sidha jaana Thahra hai

jina phir kajdar-o-marez is taur mein ho Tuk ya mat ho

shor-o-shaghab ko raaton ke hamsae tumhaare kya rowen

aise fitne kitne uThenge 'mir' ji tum jo salamat ho